Habitantenan Sero Colorado: Nan no tin responsabilidad pa decisionan tuma contra ley

SERO COLORADO – E grupo di habitantenan di Sero Colorado no tin ningun responsibilidad pa decisionnan tuma contra ley. Asina e grupo a declara den un comunicado den fin di siman. Segun e habitantenan aki, al contrario, nan ta siguracu nan a protesta e magnitud di e proyecto hotel Secrets semper uzando ley pa adverti Gobierno y indirectamente Three Rivers, cu e proyecto no ta cuadra cu ley y no ta cumpli cu e condicionnan di bienestar pa e bisindario. E habitantenan aki a sigura tambe di semper a informa gobierno den tratamento di casonan na corte cu nan no ta contra di desaroyo turistico, pero e otorgacion di un permiso di construccion tin cu bay a base di ley y maneho.

OBHECION

E obhecion contra e hotel Secrets cu ta andando for di 21 di oktober 2020, tambe a urgi pa no construi y evita haci gastonan innecesario. Construccion riba e hotel Secrets a cuminsa despues di a tuma nota di obhecion di habitantenan y contra tur e peticion di habitantenan pa no construi.

GOBIERNO

Sinembargo di ta na altura di e advertencia di parti di e habitantenan, segun e habitantenan, Gobierno a bai asina leu di hasta tuma e decision di elimina e ley cu tawata protege Aruba di cualkier posibel claim di parti di inversionistanan. “Gobierno a elimina e articulo 59 di ordenanza di construccion y Vivienda di Aruba cu tawata automaticamente para cualkier construccion ora cu ricibi un obhecion. Y asina proteha Aruba financieramente si un inversionista bin cu un claim miyonario pasobra e obra a para”. 

LEY A PARA E OBRA

Debi cu ta ley, a para e obra y no un decision di Gobierno.

A ser manda diferente carta di advertencia pa adverti Gobierno y Three Rivers pa para e construccion y evita tur e gasto nan innecesario. Gobierno tawata ta na altura di e articulo 59 di ordenanza di construccion y Vivienda di Aruba y toch a laga construccion di hotel Secrets continua. “A base di esaki nos por conclui cu Gobierno a tuma tur responsabilidad na momento cu no a para e construccion di hotel Secrets manera ley ta stipula”.

Bou ningun circunstancia por culpa habitantenan cu ta haci uso di nan derecho cu ley ta duna di a ‘laga’ Three Rivers haci inversionnan cuantioso. Segun e habitantenan, e tabata un risico cu e compania mes a tuma y no por sconde tras di posicion di Gobierno, mirando cu e caso ta den man di Corte y huristanan di e compania mester por compronde con ley ta cana.