SMOA: Studiantenan MAVO cu capacidad necesario por bai Colegio

ORANJESTAD – Studiantenan di MAVO ta bon bini na Colegio!. E fundacion cu ta maneha e.o. Colegio Arubano, esta Stichting Middelbaar Onderwijs Aruba (SMOA) a reacciona riba e cantidad di keho y reclamo cu tin ultimo tempo den medio riba e ‘restriccion’ cu lo tin pa drenta Colegio Arubano, si bo ta biniendo di un MAVO. Y segun e fundacion, cosnan no ta manera cu nan ta wordo pinta eyfo, y nan a duna nan banda di medaya.

MAL MIRA

Segun SMOA, casi tur medio di comunicacion ta dedicando atencion na e afluencia di studiantenan di Mavo na Colegio Arubano. Segun nan, ta claro cu SMOA, directiva di Colegio, ta e Zwarte Piet den e dianan aki. Ta SMOA a pone e lata mucho halto pa e Mavistanan, ta SMOA kier haci di Colegio un scol elite. “Esakinan ta un banda di e storia cu nos kier pone stret”, SMOA ta cuminsa na bisa.

Cada alumno Arubano mester haya e oportunidad pa haya un diploma segun su capacidad, un ponencia cu tur hende ta aproba. Den pasado tabata tuma casi tur alumno cu a haya aviso di scol basico na Colegio Arubano, cu e tempo ey tabata e unico scol pa HAVO/VWO riba e isla. Tabata tin un evaluacion, pero esaki tabata meramente un drempel.

CALIDAD DI ENSEÑANSA

Colegio Arubano a crece y e calidad di enseñansa a bin claramente den peliger. Hopi alumno tabata demostra di tog no tin e capacidad necesario pa logra haya e diploma, haciendo asina cu hopi mester a bandona e scol despues di algun aña sin diploma. Lamentable pa e alumnonan ey, lamentable di e placa inverti, pero tambe nada bon pa e otro alumnonan na scol. Ta hopi fastioso pa duna les den klas unda ya pa den temporada di Pasco mayoria alumno tabata sa caba cu nan lo keda sinta of mester bandona scol. Esaki ta pone un stempel riba e enseñansa y tambe e alumnonan, cu si tabata na nan luga na Colegio, a bira e victimanan.

E calidad di enseñansa mester a subi y un di e pasonan tabata pa introduci un ‘instaptoets’. E toets aki a keda diseña pa Colegio, Examenburo y representantenan di enseñansa basico. Ta trata principalmente di perspicacia matematico y eficacia den lesamento. Colegio Sanicolas, e otro scol di Havo riba e isla, tambe ta uza e toets aki.

NORMANAN TRANSITORIO MAS ESTRICTO

Segun SMOA, ya pa hopi aña Colegio Arubano ta acumula tur dato di cifra di e alumnonan. Di e datonan aki por calcula e exito escolar di e alumnonan. Di e cifranan di e prome añanan por anticipa si e alumno tin un bon chens pa logra su diploma. Esaki a proba di ta posibel y a resulta den reglanan mas estricto pa bay over di un klas pa e siguiente. Tambe e afluencia di Mavistanan a keda analisa na e manera aki. E alumnonan di Mavo ta haci examen den seis materia. A keda demostra cu e cifranan di e materianan Hulandes y Ingles por pronostica poco, mientras cu pa cu e cifra di otro cuater materianan si por a anticipa mas. A base di esaki Colegio a yega na otro norma transitorio: pa e otro cuater materianan di examen mester tin un promedio di 7.5 pa por haci entrada na Havo 4 posibel. Acerca a bin un exigencia mas cu no por tin mas cu dos onvoldoende (insuficiente) riba e lista, di cual maximo un so por ta sea Hulandes of Ingles.  

Cu esaki ta parce cu Colegio Arubano kier evita e Mavistanan. “Nada ta menos berdad !” SMOA ta sigui bisa. E alumnonan cu ta acumula nan formacion escolar ta demostra di ta perseverante y ta logra hopi den bida. Nan ta bay prome Mavo, sigui pa Havo y kisas hasta Vwo. Esaki ta exigi perseverancia, cu ta un bon cualidad pa tin den bida. Pa e alumnonan aki Colegio Arubano ta habri e portanan hancho ! E alumnonan, di cual ya caba por anticipa cu nan no lo por cu e nivel di enseñansa aki, nos kier evita nan perdida di tempo y di energia.

Tambe cu e normanan di afluencia bieu, e Mavistanan ta limita. Ta trata di mas o menos 50 alumno anualmente cu ta drenta Havo 4. E cantidad ta mas o menos igual na e cantidad di afluencia di alumno di Mavo den e otro añanan prome(Cb1 y Cb2). Despues di e prome aña na Mavo, un grupo grandi di alumno, di cual ta defini cu nan capacidad ta mas halto cu nivel Mavo ta drenta Havo y despues di dos aña ta sigui un grupo mas chikito. E alumnonan aki ta tuma epaso aki sin perdida di tempo y normalmente cu exito.

MEHORACION DI ENSEÑANSA

Reglanan pa bay over mas estricto y un ‘toelatingstoets’ mehora, a percura pa un ambiente di siña y traha mas trankilo, SMOA ta sigui raporta. Esaki ta un condicion basico pa mehoracion di enseñansa. A traha duro na e mehoransa aki e ultimo añanan y e proceso ta leu di ta cla. Colegio Arubano kier sigui traha na un enseñansa di bon calidad. No ta trata di un scol elite, manera hopi ta opina, sino un scol unda tur mucha ta haya nan derecho, si e tin e capacidad necesario pa Havo/Vwo.

Cu e desaroyonan tur hende mester ta contento; Aruba tin mester di bon enseñansa. Asina mes e reglanan nobo ta haya resistencia, principalmente di e scolnan di Mavo, apoya pa minister: e normanan di admision lo ta mucho estricto y ta corta e caminda di e alumnonan, cu sigur lo por logra un diploma di Havo. A forma un comision, consistiendo di represantantenan di Mavo y Havo. E comision mester a trata e problematica di conexion di Mavo pa Havo. E comision aki a haya, entre otro, na nan disposicion, material statistico cu Colegio tin di afluencia di Mavo, material cu ta indica cu mitar di esnan cu ta drenta no ta exitoso.

Entretanto e grupo di trabou ey a publica nan resultadonan. Un determinacion importante tabata, cu e nivel di enseñansa na e scolnan Mavo na Aruba ta laga di desea. Mehoracion di enseñansa na Mavo ta necesario. Banda di esaki e comision a bin cu bon proposicionnan pa un miho conexion, un scol di verano (zomersc hool), klasnan Mavo-plus y otro temanan. Colegio Arubano a traha gustosamente na e trabou di e comision aki y ta sostene tambe e resultadonan. E proposicionnan ta brinda un perspectiva pa un miho conexion Mavo-Havo den futuro. Un conexion cu lo duna mas Mavista un bon oportunidad pa haya un diploma di Havo.

INGRESO ACTUAL

Na momento cu Colegio a anuncia su rekisitonan di afluencia mas estricto, a bin critica di e scolnan Mavo. E anuncio lo tabata mucho laat. E reglanan nobo a keda posponi cu un aña y den e aña ey e comision por a haci su trabou. E trabou ey lo mester tabata cla pa comienso di e aña escolar aki, pero esaki no tabata e caso. P”a no haya e culpa atrobe di cu e reglanan ta laat publica, Colegio Arubano a anuncia e reglanan nobo den un etapa apropia”.

E anuncio aki a hiba na hopi critica. “Pakico haci e reglanan mas pisa, si tog nos tin plan pa drecha e situacion?”. Colegio Arubano ta duna constante indicacion cu si e plannan ey tin efecto, e ingreso lo bira topico di discusion atrobe. Sin realisacion di e plannan, e situacion actual ta keda mescos y asina tambe e motibonan pa haci e reglanan di admision mas estricto ta keda vigente.

PROMEDIO DI CIFRA

Colegio lo mester, segun algun, tuma e normanan di Hulanda, cu ta exigi un promedio di 6.8 pa e materianan di examen. Pero esaki ta dificil pa cuadra cu e stipulacion cu enseñansa na Mavo mester drecha. Si e calidad ta bou nivel, manera e comision a indica, no tin base pa tuma e normanan aki over. E normanan na Hulanda sigur no ta stipula pa minister, manera nos propio minister a trece dilanti na Staten. Un minister Hulandes ta tene su mes na e libertad di enseñansa cu ta ancra den ley y no ta entromete absolutamente cu reglanan di admision. Entromete den sorto di asuntonan asina ta nifica pa ministernan Hulandes suicidio politico. E regla di promedio 6.8 ta un sugerencia di VO-raad, un asociacion di scol. Un scol ta mantene su mes na e sugerencia, e otro no.

BON BINI

Colegio Arubano ta yama bon bini cu gusto na tur alumno di Mavo cu ta demostra di tin e capacidadnan necesario pa sigui Havo. Colegio Arubano ta traha tambe gustosamente na e mehoracion di e conexion Mavo-Havo. (Sinembargo) den e situacion actual, e reglanan di admision mas estricto ta na nan lugar.