Den un anuncio repentino, Universidad di Aruba a anuncia retiro di rector Huetger

ORANJESTAD – Dos aña despues cu e la cuminsa su labor na Aruba den calidad di Rector di Universidad di Aruba, den un anuncio repentino y ‘urgente’, Colegio di Supervision di Universidad di Aruba a anuncia cu a base di acuerdo mutuo, Rector prof. dr. Viola Heutger ta tuma despedida entrante 1 di November venidero. Esaki no a bin como un sorpresa mirando cu pa varios tempo caba, tabatin informacion circulando cu lo tin problema cu e historial academico di Heutger, unda cu hasta minister di enseñansa a sigura di lo investiga e pasado di e rector. E informacion ta cu e lo a manipula cu su curiculo, aunke esaki no a wordo comproba. Den e anuncio oficial, no ta haci mencion di esaki si. Rectorado a confirma na noticiacla awe tambe cu e contracto original lo mester a vence te aki 2 aña. 

E RELATO

E relato mas bien ta mustra e puntonan positivo durante e presencia corto di Heutger na Aruba y na Universidad. Manera cu durante su temporada como Rector, varios desaroyo positivo a tuma lugar na Universidad, entre otro:

-        Introduccion di dos programa di nivel Master nobo den “Governance & Leadership” y “Sustainable Engineering”. 

-        Acuerdo entre universidad na Hulanda, Corsow, Sint Maarten y Aruba pa intercambio di studiante. 

-        Expansion di facilidad cu reorganisacion di Centro Educativo Cristian, pa logra integra un aula pa les, oficina administrativo, y cafetaria, y e inicio di renobacion di Maria Convent. 

-        Desaroyo di varios curso y presentacion relevante pa comunidad di Aruba na The Center of Lifelong Learning. 

Esfuerso di prof. dr. Heutger a contribui na colaboracion internacional pa Universidad di Aruba cu ta beneficia studiante y enrikece investigacion academico. Colaboracion regional a resulta den un MOU cu Universidad di Corsow, Universidad di St. Maarten, y Instituto Pedagogico Arubano.

Heutger lo muda pa Europa unda e lo sigui su carera academico, incluyendo duna les na “Summer School on European Private Law” na Universidad di Salzburg y lo participa na conferencia internacional na Paris, Pisa, y Palermo.

“E Colegio di Supervision ta gradici Viola Heutger pa su contribucion na Universidad di Aruba den ultimo dos aña” e comunicado oficial ta finalisa bisando.