Marisol Lopez Tromp: Pakico a vota contra presupuesto 2015

ORANJESTAD – Marisol Lopez Tromp como parlamentario (los di ta presidente di parlamento) a vota contra e presupuesto 2015 awe marduga. Un acto cu a sorprende hopi hende, incluyendo su propio fraccion y partido, esta AVP. Segun Lopez den un declaracion na NoticiaCla.com, e hecho cu gobierno no a adapta e presupuesto, no obstante cu tin conseho di e.o. College Financieel Toezicht, ta un di e motibonan pa cual e no a vota pa e presupuesto. E acto aki, a causa disgusto entre su propio coleganan di partido, y ya caba a cuminsa vocifera cu esaki por tin consecuencia pe, como presidente di parlamento. Algun cu a vocifera nan opinion despues, a bisa cu e lo sigur no keda re-eligi como presidente di parlamento, y otronan no ta considera cu e por keda den partido. Oficialmente sinembargo, no a tende di e fraccion kico nan pensamento ta riba e asunto. Den pasado ora cu Lopez a vota diferente cu su fraccion, a considera esaki un muestra di democracia y cu e fraccion no ta parti di un 'stempel parlement'. 

PROTOCOL

Segun Lopez, a base di e protocol cu gobierno a firma recientemente cu Hulanda, cu tin diferente condicion aden pa cumpli cune, e la sinti cu e presupuesto aki mester un extra conseho pa por determina si enberdad e ta cumpli cu e loke cu gobierno a palabra. “Lamentablemente esaki a wordo rechasa door di mayoria den sala. Como statenlid mi kier a haya conseho aki pa mi ta mas sigur di e begroting , cu si e ta cumpli realmente cu loke a wordo palabra” Lopez a bisa.

LIBER PA EXPRESA

E di dos punto, riba e votacion mes, Lopez ta mustra cu como miembro di parlamento, cada un persona ta liber pa tin nan opinion y motibo pa sostene algo y pakico no. E ta apoya e proyectonan y iniciativanan di ley, pero su precupacion ta cu ainda no tin suficiente pasonan tuma, pa yega na baha e deficit cu nos tin.

VOTA CONTRA FRACCION

Lopez no ta sinti cu e la vota contra un fraccion. “Mi ta sinti cu mi ta vota riba un presupuesto cu mi tin cu duna pueblo cuenta riba dje. Mi ta vota cu mi pensamento y consenshi, a base di e datonan cu mi tin” Lopez a sigui bisa. E la bisa tambe na varios ocacion cu e no ta den politica pa haci cosnan ‘leuk’ so. “Tin biaha e berdad tin cu wordo bisa hopi cla, di cosnan cu mester sosode” Lopez a bisa. E no kier pa e pais ta endeuda di tal forma cu nos yiunan y nietonan tin cu paga pe.”Mester cuminsa awo pa tuma cierto decisionnan responsabel y implementa esakinan”.

DECISION FACIL?

Lopez ta admiti cu e decision no tabata uno facil, pero e tabata uno tuma pa e puntonan menciona paden. “Si acaso cu e sala a bay di acuerdo pa haya un di dos toetsing, esey lo por a trece mas claridad ainda y pone mas parlamentario tuma un decision concreto y si begroting ta cuadra actualmente”. Scucha e entrevista completo cu Marisol Lopez Tromp aki.