Van Huffelen: Aruba tin te awe mainta pa firma acuerdo di prestamo ofreci

DEN HAAG - Mas tarda awe, tur paisnan cu a haya prestamo di Hulanda den Reino Hulandes, mester a firma e acuerdo di prestamo di refinanciamento. Asina secretario di estado Hulandes Alexandra van Huffelen a bisa dialuna, un dia prome cu e deadline, den un carta na Tweede Kamer. Riba pregunta di Noticiacla diamars na e secretario, si esaki ta inclui Aruba tambe, e contesta tabata ‘si e ta conta pa Aruba tambe’. E pregunta a bin debi cu den un otro raportahe di e portal aki, e mandatario Hulandes ta bisa cu ya cu Aruba no a yega na un acuerdo  ainda, e la dicidi siman pasa diabierna cu Aruba ta haya oferta di e prestamo, pero cu un tasa di interes halto di 6.9%.

DEADLINE

“Pesey mi a bisa e paisnan pa firma e acuerdonan di refinanciamento mas tarda dia 10 di oktober den oranan di mainta” van Huffelen a bisa Tweede Kamer. E mandatario a bisa tambe cu e ta spera cu Eerste Kamer aproba e presupuesto supletorio incidental (ISB) awe. Despues di e aprobacion, Van Huffelen mes lo firma e acuerdo di prestamo.