Huez a suspende decision di minister Croes contra director di DIMAS

ORANJESTAD – Huez a suspende e decision di minister Glenbert Croes di 2 di augustus 2023, pa actual director di DIMAS, Kathyt Paskel fungi como hurista di departamento legislativo di gobierno pa un periodo di 6 luna, te ora cu corte dicidi riba e keho entrega. Esaki kier men cu e directora Kathy Paskel por bolbe traha na DIMAS por lo pronto. Noticiacla a compronde di Paskel cu awe mainta mes e la bolbe na pia di trabou. 

E CASO

Tabata despues cu e minister menciona, a ordena pa Paskel raporta na su funcion ‘nobo’, cu Paskel a pidi corte pa tuma e decision pa suspende e decision di e minister. Oficialmente e la entrega keho contra esaki dia 29 di augustus ultimo, y corte a trata e peticion 18 di September ultimo. E punto ta cu e minister en cuestion no kier pa Paskel bolbe na DIMAS como director y pa medio di un articulo specifico den LMA di gobierno, logra esaki. Como tal ta mustra segun Paskel, cu e decision cu e minister a tuma pa ‘6 luna’, en realidad no ta 6 luna pues no ta algo temporal.  Ademas, Paskel ta mustra cu e funcion cu e mandatario a ordena pa Paskel haci temporal, ta un destitucion formal. Tambe Paskel a mustra cu e minister a ofrec’e e funcion permanente como director di labor of mediado di gobierno. Pero Paskel a mustra corte cu e no tin confiansa mas den e minister. 

CONFIANSA

E motibo duna pa minister pa e ‘overplaatsing temporal’ di Paskel, ta cu e no tin e confiansa mas den Paskel y como talo kier pa e bay traha na disposicion di DWJZ. Y como cu e no kier pa Paskel bolbe como director di DIMAS, e ta buscando un solucion temporal. Ademas a sigura cu no ta e intencion cu mientras cu Paskel ta na DWJZ, cu lo busca un otro persona pa  reemplaza Paskel. Tambe e minister a sigura cu prome minister bou di cual DWJZ ta resorta, a bay di acuerdo cu e decision temporal pa move Paskel. 

PERMISO

Huez a motiva den e caso cu un decision manera cu a wordo tuma, mester wordo tuma pa tanto e minister bou di cual e departamento ta resorta unda cu Paskel meste a bay traha, como cu e minister bou di cual Paskel ta traha normalmente. Den e caso aki esey no tabata e echo, ya cu ta solamente minister Glenbert Croes a tuma e decision ey, tin falta di decision di un minister y esey ta haci e decision tuma, como no valido. Riba su mes sinembargo, esey no ta suficiente motibo pa duna Paskel razon. Pero, huez ta mustra si cu ora cu un minister ta declara di no tin confiansa mas den e persona en cuestion, esaki no kier men cu e por deshaci di e persona sin mas. “Ambtenaarnan no mester bira e bala di wega di politica y mester wordo proteha” e huez ta bisa. Y no tin suficiente motibo duna di e minister pa desconfia di. Directora. Huez ta di pensamento cu e decision di minister ta conduci na un situacion no faborabel pa Paskel, y como tal ta suspendi e decision temporalmente. Por lesa e sentencia AKI.