Parlamento a aproba presupuesto 2015

ORANJESTAD – Exactamente dos siman despues cu a inicia cu su tratamento, y despues di 17 ora di votacion riba diamars, parlamento a vota y aproba e presupuesto 2015 diaranson marduga  pa 12 voto fabor 9 voto en contra. Esnan cu a vota pro ta fraccion di AVP, menos presidente di parlamento Marisol Lopez Tromp, y esnan cu a vota contra, ta fraccion di MEP, fraccion di Democracia Real y Marisol Lopez Tromp.  Mientras cu e cantidad di 21 mocion (lesa e mocionnan y nan votacion aki), 2 amienda (lesa e amiendanan aki),  y e concepto di ley mes di presupuesto  (lesa e votacion aki), a mustra hopi, su tratamento no a tarda mes hopi cu e discusion riba un extra toetsing pa raad van advies. E aña aki a opta pa trata cada cartera di minister separa, cu a pone tambe cu e tratamento a dura un poco mas largo.

DISCUSION RIBA 'EXTRA TOETS' RAAD VAN ADVIES

Net prome cu e votamento di presupuesto, a surgi un discusion den parlamento, ora cu fraccion di MEP a pidi pa Raad van Advies toets e amienda pa e aumento di health tax/BBO cu 1% y eventualmente e presupuesto. Pa sorpresa di hopi, presidente di parlamento Marisol Lopez Tromp a uni cu e pensamento di fraccion di MEP, indicando cu e tambe kier un di dos conseho. Esaki a conduci na un discusion cu su miembronan di partido. E discusion a bira cu kier cambia e reglement di orden, di parlamento, y na final a dicidi cu mayoria ta dicidi. Despues di e discusion, -cu a dura basta largo y a bira basta emocional-, a continua cu tratamento di e votamento. Sinembargo, tabata notable cu e la laga un sabor amargo entre coleganan di fraccion di e partido berde, cu esun di e presidente di parlamento, Marisol Lopez Tromp.