Conseho di minister di Corsou ta dicidi awe riba caso di Ennia

WILLEMSTAD - Awe tantu konseho di Minister di Kòrsou komo Konseho di Minister di St. Maarten lo bini huntu den un reunion ekstraordinario pa tuma un desishon riba solushon pa kompania di seguro ENNIA Leven Caribe. E oferta di Hulanda pa fia Kòrsou i St. Maarten 600 mion euro pa kapitalisá ENNIA manera deskribí den e “hoofdlijnenakkoord” ainda ta riba mesa.

E promé indikashonnan ku EXTRA a risibí for di seno gubernamental sinembargo no ta alentador. Riba e pregunta si ta bai aprobá e oferta, a haña komo kontesta: “Mañan ta disidí. E ta mas no ku si”. For di sektor finansiero lokal ku tambe ta sigui e desaroyonan di aserka por a komprondé ku “e kos no ta pinta bon”.

Un di e konsiderashonnan di gobièrnu di Kòrsou pa lo no aseptá e fiansa ta e posibilidat di por keda hasi fiansa pa invershonnan di kapital.

Den un promé kalkulashon di Banko Sentral a bin dilanti ku si tuma e fiansa di 600 mion euro ainda ta keda espasio pa Kòrsou fia 150 mion pa invertí den proyektonan ekonómiko por ehèmpel. Pero entretantu a bini bèk riba e kalkulashonnan aki i e indikashonnan mas resien ta ku si fia sèn pa kapitalisá ENNIA, no tin espasio pa fia mas sèn pa próksimo 10 aña.

Otro aspekto ku ta hunga un ròl, cu a yega indiká anteriormente kaba ta e “rentelastnorm” manera Kolegio Supervishon Finansiero, Cft a indiká den nan konseho riba presupuesto 2024. Segun Cft ku e re -finansiamentu di debe di Corona i e fiansa di 600 mion euro Kòrsou ta surpasá e norma máksimo na interes ku por paga pa aña konforme e lei di supervishon finansiero. Den deklarashon pa e korant di St. Maarten The Daily Herald, Van Huffelen ta bisa ku ta hopi serka di yega na un akuerdo riba e oferta di Hulanda pa fia Kòrsou i St. Maarten 600 mion euro pa kapitalisá ENNIA. “Apesar ku e “deadline” di fin di sèptèmber a pasa e oferta ta riba mesa ainda”, Van Huffelen a deklará na e korant.

E sekretario di estado ta indiká ku a hiba diferente deliberashon ku gobièrnunan di St. Maarten i Kòrsou i ku e ta spera ku den dianan benidero ta yega na un akuerdo final na bienestar di e penshonadonan ku ta kobra penshun na ENNIA i tambe esnan ku ta paga prima pa kobra un penshun den futuro.

Despues di a yega Kòrsou djamars último Van Huffelen a reuní ku miembronan di gabinete Pisas riba e situashon di ENNIA. Awe den un reunion ekstraordinario pues lo bai tuma un tipo di desishon relashoná ku ENNIA.

Minister di Finansa di St. Maarten, Ardwell Irion i promé minister Sylveria Jacobs a bisa durante e konferensia di prensa ayera ku gobièrnu di St. Maarten su úniko interes ta pa yega na un akuerdo mas faborabel posibel pa pais, kaminda ta garantisá alabes penshun di e penshonadonan ku tin un pólisa na ENNIA.

Manera ta konosí un akuerdo riba ENNIA ta kondishon pa Kòrsou i St. Maarten haña refinansiamentu di e debe di Corona kontra kondishonnan faborabel manera un tasa di interes di 3,1 porshento. Pa St. Maarten ta konta alabes un areglo di pago bèk faborabel di e refinansiamentu. NOTA: E texto ta scirbi den Papiamento fonetico di Corsou.