Minister Hulandes Christianne van der Wal ta bishita Aruba

DEN HAAG/ ORANJESTAD - Minister di Naturalesa y Nitrogeno, Christianne van der Wal, lo bishita e parti Caribense di Reino di 3 pa 8 october proximo. For di 8 october te cu 12 october  Director General pa Naturalesa y Pesca Donné Slangen ta representa Minister van der Wal. E biahe ta den cuadro di e Plan di Maneho di Naturalesa y Medioambiente di Hulanda Caribense 2020-2030, e conferensia internacional na Aruba tocante proteccion di biodiversidad den region di Caribe, y fortificacion di coperacion entre e paisnan di Reino. 

Durante su bishita, e minister gustosamente lo kier mira con ta para cu naturalesa riba e islanan y lo papia cu esnan envolvi tocante progreso y implementacion di e Plan di Maneho di Naturalesa y Medioambiente. Na Aruba e ta participa na e parti ministerial di e reunion di Convencion di Cartagena pa proteccion di Biodiversidad den e region Caribense. 

ARUBA

Na Aruba e minister ta spera di firma un acuerdo di coperacion cu e ministernan di Sint Maarten, Corsou y Aruba riba tereno di agricultura, naturalesa, asuntonan veterinario y internacional. E tres paisnan lo comparti conosemento y copera entre otro den investigacion, reunion internacional y creacion di un Plan Nacional di Accion Strategico pa Biodiversidad pa implementacion di e palabracion internacional haci durante e COP15 Biodiversidad na Montreal na december 2022. 

Ademas minister Van der Wal ta participa na e Sesion di Nivel Halto di COP-17 di e Convencion di Cartagena na Aruba. E tratado aki ta enfoca riba proteccion di biodiversidad marino den region di Caribe pa medio di, por ehemplo, indica e areanan proteha y especie di mata y animal proteha. Tambe e minister lo sostene un Memorandum of Understanding (MoU) pa establece un mecanismo di cordinacion pa promove maneho integral di oceano den e region Caribense.