AVP: Lo reducci prima AZV y aumenta health tax

ORANJESTAD –Manera tabata e pensamento, fraccion di AVP den parlamento awe nochi a trece un amienda unda lo avansa riba e cambio di impuesto directo pa impuesto indirecto. E amiendo presenta awe nochi ta pone cu entrante prome di juli 2015, e prima di AZV pa empleadonan lo baha di 2.6% pa 1.6%. Alaves e tarifa di e health tax lo ser aumenta cu 1%. E intencion ta pa pasa e amienda awe nochi ainda durante e reunion di parlamento.

PODER DI COMPRA

Segun e partido, e reduccion di prima lo percura pa mantene e poder di compra di nos ciudadanonan den liña cu e programa di gobernacion di Gabinete Mike Eman II, mientras cu e aumento di e tarifa di health taxlo garantisa un fluho di entrada mas estable pa e fondo di seguro medico AZV. E partido ta sigura cu esaki ta den liña di recomendacionnann di Raad van Advies. E transicion pa impuesto indirecto lo no afecta e salarionan neto. Tur hende, incluso e 1 miyon turista cu ta bishita Aruba, lo contribui na cubri gastonan di cuido medico pa pueblo. Di e forma aki hopi mas hende ta contribui na cubri e gastonan medico. Esaki ta fortalece e posicion di e fondo di seguro medico ye pakete cu cuido medico no ta cambia.

REDUCCION

E partido ta calcula cu e reduccion substancial di gasto aki lo wordo traduci den un reduccion di deficit di 15 miyon florin pa aña 2015. Pa aña 2015, Gobierno a atene su mes di cumpli cu un deficit di -3.7%. Cu e amienda presenta pa fraccion di AVP den Parlamento, lo reduci e deficit presupuestario un poco mas y ta sigura cu lo cumpli cu e normanan stipula den e meerjarenraming.