Problema di schoolgeld cu SKOA resolvi!

ORANJESTAD - Despues di varios deliberacion awe minister di enseñansa Michelle Hooyboer y SKOA a anuncia cu nan a yega na otro pa loke ta trata e aumento di schoolgeld. Esaki ta encera un suma reduci di locual SKOA a anuncia inicialmente y lo mantene esaki pa sigur dos aña mas. Mientrastanto lo sigui analisa e gastonan di operacion di scolnan di cerca, tanto den infrastructura como gastonan di personal.

AUMENTO

Na November 2014 SKOA a anuncia cu lo bin cu aumento di e schoolgeld cu mayornan ta paga SKOA pa cada yiu cu ta bay scol. Despues di 14 aña cu a aplica e mesun suma, logicamente e fundacion cu ta maneha e grupo di mas grandi di nos scolnan, no por a sigui opera sin un adaptacion di e schoolgeld.

SUMA NOBO

Minister di enseñansa y SKOA tabata diferencia riba e suma cu SKOA a stipula. Despues di a habri deliberacionnan bek, Minister Hooyboer-Winklaar y SKOA ta anuncia awe cu partidonan a yega na otro unda a stipula schoolgeld pa aña escolar 2015-2016 na Afl. 175 en bes di Afl. 250. Esaki lo ta mara pa 2 aña escolar, pues te aña escolar 2016-2017.

CASONAN INDIVIDUAL

Pa loke ta trata famianan cu por tin dificultad pa paga e suma aki, SKOA lo atende cu e casonan aki unda ta necesario individualmente manera ta custumber pa varios aña caba. E siman aki cartanan lo bai cas pa informa mayornan debidamente.

A base di e acuerdo aki, Minister di Enseñansa lo trek in e caso pendiente den corte e luna aki. Ambos partido ta satisfecho cu por a yega na otro, sin cu mester a bai corte, y cu lo por sigui traha conhuntamente riba enseñansa y treciendo cambionan necesario pa mehora nos enseñansa.