Van Huffelen ta evita Aruba, y ta bishita Sint Maarten, Corsou y Bonaire

DEN HAAG – Secretario di estado Alexandra van Huffelen ta na caminda pa e islanan di Reino Hulandes, unda cu e ta cuminsa su bishita na St Maarten, sigui pa Corsou y termina su bishita na Bonaire. Notable ta cu e ta ‘skip’ Aruba e biaha aki. Esaki no ta inusual pasobra a yega di pasa cu e ta opta pa skip cierto isla, depende e tema di e bishita. Oficialmente no tin un declaracion haci riba e motibo e biaha aki, pero e portal aki a compronde cu e motibo ta cu no tin nada concreto cu Aruba pa papia, pues no tin motibo pa un bishita pa e isla aki. Manera ta conoci, ainda Aruba y Hulanda no ta hayando otro riba e acuerdo pa loke ta RAFt y e refinanciamento di e debe di Covid19. Mes momento sinembargo, e no tin un acuerdo cu Corsou tampoco y e deadline pa cu e acuerdo pa cu e situacion di Ennia ta vence diasabra awor. No ta conoci si esaki por ta un motibo cu e no ta bishita Aruba. E bishita ta inicia diasabra 30 di September na St Maarten, sigui pa Corsou dia 2 di oktober, y dia 5 di oktober e ta yega Bonaire pa un dia y despues ta bolbe Hulanda. Temanan di su bishita ta entre otro pasado di esclavitud,  tema di LHBTQI+ y e relacion financiero entre e asina yama Hulandes Europeo y Caribe Hulandes.  Dia 5 di oktober Van Huffelen ta bolbe Hulanda.