Decretonan gubernamental na caminda pa polis

ORANJESTAD: - Diamars mainta Minister di Husticia mr. Arthur Dowers a firma e Landsbesluitnan pa un grupo di funcionarionan policial, kendenan a finalisa nan “kader opleiding” y manda esakinan pa Gobernador di Aruba. Asina aki nan lo por haya e promocionnan cu nan tabata sperando riba dje. E mandatario a expresa palabra di trankilidad pa e Presidente di SPA, Angelo Davelaar, kende na diferente ocasion a expresa su preocupacion pa e tardanza, di e miembronan di Cuerpo Policial, pa haya nan Landsbesluitnan cu nan promocion corespondiente. E mandatario a admiti si, cu e no ta un trabou facil pa procesa tur e documentonan “pero nos tin e watchdog (SPA) y su presidente cu ta vigila pa e situacion cana”. Minister Dowers a reconoce cu no tur ora e ta di acuerdo cu e ponencianan di e Presidente di SPA, sinembargo, e por bisa cu e sindicalista aki ta y a haci un tremendo trabou na bienestar di su coleganan. E mandatario a finalisa bisando cu e ta consciente di e importancia cu landsbesluitnan mester ta cla na tempo pa, den e caso aki, funcionarionan policial por haya nan promocion.