Oduber: Cifranan di AAA ta indica cu tin un demanda fuerte pa Aruba

ORANJESTAD – Cifranan di Aeropuerto (Aruba Airport Authority NV) AAA ta indica cu tin un demanda fuerte pa Aruba. Asina minister di Turismo Dangui Oduber ta bisa e siman aki. E ta hopi satisfecho cu e cifranan mas recien di Aruba Airport Authority (AAA).  Recientemente AAA a publica nan cifranan pa cu luna di augustus. E raportahe segun e mandatario, ta mustra cu e trafico di pasahero a conoce un crecemento di 113% porciento di augustus 2022 pa augustus 2023, esaki ta ekivalente na 107 mil pasahero adicional.

Den e raportahe di AAA por a tuma nota di un recuperacion di 104% porciento di e trafico di pasahero den comparacion cu aña 2019. Esaki sigur ta algo impresionante segun e mandatario. Nos mercado di mas grandi ta keda e mercado Mericano cu ta 73% porciento. Mayoria di e trafico ta procedente di Noord America y Sur America. Cifranan ta indica cu tin un demanda fuerte pa cu Aruba como destinacion.

Minister Oduber a duna di conoce cu AAA ta calcula cu na fin aña 2023 nan lo tin un crecemento den entrada di 7% porciento den comparacion cu aña 2019 y 12.5% mas cu na aña 2022. E mandatario a sigui bisa cu segun pronosticonan haci pa AAA den aña 2024 lo tin un crecemento den entrada di 11% den comparacion cu aña 2019.