Brouwerij Nacional Balashi ta sponsor orguyoso di Copa ABCS

ORANJESTAD - E miho ekiponan di softball di islanan Aruba, Boneiro, Corsou y Sint Maarten ta topa na Aruba diahuebs, diabierna y diasabra den batayanan fuerte riba Veld di Kudawecha pa determina cua teamnan lo hunga e prefinal y final riba diadomingo. E ultimo tres añanan Happy Brothers di Aruba a sali subcampeon di e torneo y awo cu e competencianan a bolbe “cas”, Happy Brothers ta determina di gana for di su gran rival, esta Swift di Corsou e aña aki si.

Poy Flanegin, kende ta president di Happy Brothers a splica cu lo tin 12 team den e competencia pa su di 32 edicion anual. Durante di e ceremonia di apertura diahuebs anochi pa 7:15 na Veld di Kudawecha lo rindi honor na un di su iniciadornan, esta Ronny Gomez. E ruman di Ronny, esta Boebies Gomez (dfm), tabata e co-organisador di e prome torneonan. E dos rumannan tabata lidera Astro Softball Organization tempo nan a organisa e prome torneo, cu tabata Copa ABC, hunto cu Chay Curie di Corsou y Freddy Sint Jago di Boneiro. Añanan despues Sint Maarten tambe a uni na e torneo y e nomber a bira Copa ABCS. E otro baluarte di softball na kende e torneo ta dedica, ta Loekie Winterdaal, un hungado, lider den e deporte y un gran sostenedo di e Campeonato.

E torneo ta cuminsa diahuebs mainta pa 10or y mey; pa 7:15 di anochi e apertura oficial ta tuma luga y pa 8’or y mey lo e subcampeon di 2014 Happy Brothers lo enfrenta e campeon di 2014 Swift riba veld den un wega “tur cu tin”. Ta conta cu entretenimento di Delicious Band. Riba diabierna e weganan ta cuminsa pa 12or di merdia y ta sigui te cu 11’or di anochi. Den oranan di anochi e ekipo di Balashi lo hunga den un “wega amistoso” contra e ekipo di Renaissance.

Diasabra merdia pa 12or e weganan ta cuminsa atrobe. Riba e prome tres dianan lo tin cada dia seis wega. Diadomingo Tsunami lo entretene public durante di e prefinals y finals. Tur cuater dia Miniteca Mige lo deleita y anima publico cu nan musica. Lo tin musica, ambiente, un cushina y bar bon surti y premionan adicional cu lo wordo rifa pa medio di “strikvraag” durante di e weganan. Brouwerij Nacional Balashi ta invita comunidad di Aruba, pero specialmente amantenan di softball pa pasa na Veld di Kudawecha, disfruta di softball di nivel halto y un ambiente excelente, pero principalmente, bin apoya e teamnan di Aruba pa e copa keda cas.