"Broodje Gezond" pa tur nurse riba 'Dia di Enfermeria'

ORANJESTAD - Dia 12 di mei ta Dia di Enfermeria y na Aruba ta forma e culminacion di e 'Siman di Enfermeria', manera decreta pa Gobierno. Na Dr. Horacio E. Oduber Hospitaal e dia a cuminsa cu e tradicional desayuno, unda cu miembronan di gerencia a sirbi empleadonan un dushi treat. DIRECTOR Director Medico di Hospital, esta Ezzard Cilie a splica cu diamars e mas of menos 950 empleadonan a wordo sirbi pa nan hefenan como muestra di aprecio pa nan trabao duro. Na Hospital ta custumber tambe, el a bisa, cu no ta solamente e enfermero nan ta wordo extra malcria, pero cu tur nan coleganan cu ta “ondersteun” nan ta wordo invita pa participa na diferente di e actividadnan tambe. Esaki naturalmente ta haci e celebracion aki un poco mas special, den estilo tipico di un famia grandi Arubano. DESAYUNO E desayuno super saludabel, consistiendo di entre otro un “broodje gezond”, fruta, yoghurt y webo herbi, a wordo sirbi den e cafetaria di hospital. Na porta di e cafetaria nan a wordo ricibi pa Director Financiero di Hospital, Sr. Theo de Kool y pa Director Medico di. Hospital, sr. Ezzard Cilie, kendenan a felicita cada un empleado riba e dia bunita aki y a desea nan un dushi dia.