Alarma pa avion di buelo di Insel Air pa Miami

ORANJESTAD – Un avion di Insel Air cu 130 pasahero abordo, a aterisa sano y salvo merdia na Aruba despues di a bati alarma grandi pa problema tecnico. Apenas algun rato cu e avion MD-80 di Insel Air International a lanta buelo rumbo pa Miami, e la bati alarma. E problema tabata e porta di e wiel di dilanti. Despues di a bati alarma, tur tramite a tuma lugar pa prepara pa e posibel aterisahe di emergencia. A mobilisa bombero, ambulance y polis pa por sigura tanto aeropuerto como e avion si ta necesario. Pero na final di cuenta, tur cos a bay bon y e avion a aterisa sin ningun problema. Segun CEO di e compania, Frederick Nuboer, e pasaheronan cu a keda perhudica merdia, lo biaha awe nochi mes pa Miami.