Censo e prome instacia di gobierno cu tin loket digital

ORANJESTAD - Recientemente Censo, conhuntamente cu Orbitalnets, a lansa www.censo.aw. Esaki ta un website hopi moderno cu informacion esencial pa tur ciudadano di Aruba. Cu esaki tambe Aruba a haya su prome ‘digitaal loket’, algo conoci pa basta aña caba na paisnan manera Hulanda.

DIGILOK

Censo ta e prome instacia di gobierno cu tin un loket digital. Un loket digital berdadero no ta un website caminda solamente por haya informacion di e servicionan y productonan di un instancia, pero ta caminda e instancia ta ofrece nan servicio online, 24 ora pa dia. Censo ta cuminsa cu 4 producto cu por haci online, esta; Afspraak Maken, Adreswijziging, Huisnummer Aanvragen y Verzoek tot Uitschrijving. Esaki kemen cu no mester presenta fisicamente mas na Censo pa yena formulario y haci e proceduranan necesario pa e productonan menciona.

SMART FORMS

E website a wordo diseña y desaroya pa Orbitalnets. A haci uzo di e ultimo den tecnologia riba e tereno pa haci e bishita di e website uno facil, lihe y placentero pa tur hende. E website ta accesibel riba tur smartphone y tablet. Tambe e digitaal loket ta traha cu Smart Forms, formularionan online cu ta cambia automaticamente basa riba loke e usuario kies. Depende na e escogencia di e persona e formulario mes ta cambia y ta indica ki rekisitonan mester tene cuenta cu ne. Por ehempel, den e caso di mudamento pa un cas di huur, mester kies pa e formulario ‘Adreswijziging’ y e mes lo indica cu den e caso aki mester di un machtiging di e doño di cas.