OM: Accion di Afpakteam na aeropuerto ayera, tabata pa manda ‘señal’ cu ta control constant!

ORANJESTAD – E accion cu Ministerio Publico a raporta ayera di afpakteam na Aeropuerto Reina Beatrix, ta algo cu nan lo tene regularmente di awor en Adelante. Asina vocero di Ministerio Publico Ann Angela a clarifica pa Noticiacla. Ayera a anuncia cu a controla riba tur buelo pa Republica Dominicana. Noticiacla a puntra pakico e aeroliña ey y kico e resultado tabata. “No a detene ningun hende y tampoco a confisca placa” Angela a sigura e portal aki. “E tabata mas tanto un señal” y e motibo pakico a cuminsa cu e aeroliña ey tambe tabatin su motibo. “Dicon a cuminza ey? E ta un escogencia cu a wordo haci. E intencion ta pa Afpakteam regularmente tene e tipo di accionnan aki di awor pa dilanti na airport”, Angela a finalisa bisando. 

E ACCION DI AYERA

Manera Noticiacla a raporta ayera tardi, Afpakteam a tene un control integral riba diferente vuelo pa Republica Dominicana segun Ministerio Publico. E control tabata dirigi riba violacion di e meldplicht di cantidadnan di placa cash. Cada viahero ta obliga pa meld na Aduana si nan tin mas cu 11.000 Dollar of 20.000 Florin cu nan. Sinembargo, no a bisa pakico tabata specificamente riba e buelonan aki y tampoco si a logra confisca placa y cuanto. 

KICO TA AFPAKTEAM

Afpakteam ta un alianza di Ministerio Publico, Polis, Aduana, FIU (Financial Intelligence Unit), Marechaussee, Kustwacht y RST y ta traha riba combati criminalidad financiero-economico. Cu tips y señalnan di labamento di placa bo persona por acerca Afpakteam via tiplijn (11141).