Marina ta intercepta casi un tonelada di cocaina den region Caribe Hulandes

ORANJESTAD - Zr.Ms. Groningen a interseptá kasi 1.000 kilo di kokaina, durante 2 kaptura di droga den Region Karibe Hulandes. Esei a sosedé ya kaba riba dianan 11 i 12 di Sèptèmber último, pero awe numa a keda publiká. Durante promé kaptura e sospechosonan a entregá nan mes numa despues di tirunan di atvertensha.

Den ámbos kaso Zr.Ms. Groningen a keda informá pa un avion di patruya Merikano tokante e go-fastnan sospechoso.  Riba esaki e boto rápido di intersepshon FRISC a drenta akshon. Na bordo di esaki tabatin no solamente tripulashon di Groningen, pero tambe un delegashon di  ‘US Coast Guard’ Wardakosta Merikano.

Durante e promé akshon e sospechosonan no tabata kier a entrega nan mes fásilmente. Esaki a sosedé numa despues di tirunan di atvertensha.  Durante e di dos akshon esaki no tabata nesesario. Tur e sospechosonan  ademas di e total di mas o ménos 985 kilo  di kontrabanda, a keda entregá na e Merikanonan. Nan lo sigui ku e persekushon legal.

BARKU PATRUYERO

Zr.Ms. Groningen for di mei 2023 ta aktivo den Region Karibe Hulandes komo barku di patruya. E barku di Marina Hulandes entre otro ta keda desplegá  durante di operashonnan anti droga. Esaki e ta hasi huntu ku Wardakosta Region Karibe Hulandes i Wardakosta di Estádos Unídos di Merka. NOTA: Texto ta scirbi den Papiamento fonetico di Corsou.