Shoco sa spel: Aruba cu su propio version di ‘Spelling Bee”

ORANJESTAD – Aruba lo conoce su propio version di e conocido Spelling Bee, manera cu tin na Merca. Gobierno di Aruba a team up cue partner principal den e proyecto nacional nobo, esta Fundacion Bon Nochi Drumi Dushi, cu na october Aruba lo presenta su “spelling bee” oficial. E evento aki ta hiba e nomber di “Shoco sa spel”, e lo wordo presenta den tres idioma y ta invitando tur scol basico pa participa.

PROYECTO PILOTO

Minister Hooyboer-Winklaar, den representacion di gobierno, a splica cu lo tin un proyecto piloto tumando luga riba dia 22 di juni na e auditorio di EPI cu 10 participante di zesde klas di tres diferente scol, Pieter Boer Basisschool, Colegio Cristo Rey y Scol Basico Washington. E “test” aki ta na Papiamento, pero pa e competencia nacional na october lo tin haci uzo di tres idioma, Papiamento, Hulandes y Ingles pa asina duna e oportunidad pa participantenan di diferente scol y ofrece participantenan escogencia di e idioma cu nan ta mas comodo cune.

FONDONAN

E proyecto aki ta wordo financia cu e fondonan cu Aruba ta ricibiendo proximamente for di Union Europeo. E legislacion pa cu e fondonan aki ta casi cla y e placa ta wordo inverti den proyectonan specifico pa cu tin efecto riba e calidad di enseñansa, prestacionnan den enseñansa y topiconan cu ta eleva e calidad di enseñansa, el a agrega.

INTENCION

Cu “Shoco ta spel” un inversion ta wordo haci riba nivel nacional, unda cu tur scol basico ta wordo invita pa participa. E intencion ta pa entre otro promove e uzo corecto di idiomanan y lanta interes pa deletra palabranan corecto entre nos muchanan. Cu e spelling bee ta busca pa capta nan atencion, pa motiva nan pa explora y siña mas palabra, pa traha hunto na siña palabranan nobo, y principalmente pa e hobennan diberti y disfruta di competencia sano practicando uzo di idioma y palabra.

Shoco ta spel lo tin efectonan pa cu pensamento di e hobennan y nan dominio di idioma y na mes momento ta presenta un actividad leuk unda nan ta competi contra otro, segun Hooyboer-Winklaar.

MIDI PAPIAMENTO

Cu e programa piloto na juni lo probecha pa midi e uzo di e idioma Papiamento entre nos hobennan y tambe lo uza sesion aki pa hisa conscientisacion pa uzo di Papiamento. Uzando mas idioma durante di e competencia na october ta amplia e base pa e hobennan pidi pa e idioma cu nan ta confortabel cune, pero tambe ta fungi como un showcase pa e talento y facilidad cu nos hobennan tin pa cu uzo di idioma.

Hooyboer-Winklaar a bisa cu ta introduci un otro angulo di enseñansa y ta brinda un otro oportunidad pa presenta e parti di enseñansa y siñamento pafo di scol, ta lanta e interes, cende e candela pa e hobennan desaroya nan lesamento, spelling y idioma.