Agente policial ta tende diahuebs si e tin cu keda deteni mas tempo ainda

ORANJESTAD- Agente policial R. Vos ta presenta dilanti huez diahuebs atrobe, pa tende con su caso ta desaroyando y pa sa si tin fecha pa tratamento di su caso. Loke ta interesante ta cu mientrastanto huez no ta permitie pa ta den libertad temporal. Ultimo biaha cu esaki a keda trata tabata na juni ultimo. Vos ta wordo acusa di malversacion na pia di trabao, tumamento di regalo y labamento di placa durante e periodo entre oktober 2018 te maart 2023. Ora cu a detene e aña aki, lo a haya varios aparato electronico cu cual ta pensa cu e lo tabata suministra cierto medionan di comunicacion cu informacion di polis. Ademas lo a haya mas artefacto di polis cu lo no ta permiti pa ta den su poder. 

HOPI INVESTIGACION

Ultimo biaha cu Vos a para dilanti huez, su abogado de Sousa a trata na tur manera pa logra libertad di su cliente, pero fiscal no kier a tende nada. Segun e fiscal, e informacion y material cu a confisca na cas di Vos, ta hopi y tabata rekeri hopi mas tempo pa investiga y mientrastanto mester tin e confiansa cu e libertad di Vos no ta bay perhudica e investigacion aki. Huez na final a dicidi pa bay di acuerdo cu ponencia di e fiscal y cu e investigacion ta pisa mas pisa cu motibonan argumenta pa laga Vos liber. Ta sigur cu diahuebs un biaha mas e abogado lo haci intento pa Vos recobra su libertad te ora cu e caso bin dilanti.