AAA: Anfitrion pa 42 aeropuerto miembro di Airport Council International

ORANJESTAD – E siman aki aeropuerto di Aruba ta anfitrion pa 42 aeropuerto internacional, durante e “Airports Council International (ACI) World Safety & Technical Committee Meetings” cu lo tuma lugar na Aruba for di 12 pa 15 di mei 2015. E reunionnan anual aki cada aña ta wordo teni na un pais diferente .E participantenan participando den e reunionnan aki ta procedente di varios aeropuerto reconoci, manera aeropuertonan di Dubai, Brussels, Israel, Brisbane, Roma, Sur Africa, Toronto y Panama, djis pa menciona algun. E miembronan di e comision cu ta profesionalnan den safety y operations di e diferente aeropuertonan lo trata diferente topico di importancia cu ta relevante pa e promocion di safety na cada aeropuerto cu ta participa. Topiconan manera Apron Safety Handbook, Safety Management Systems Handbook y Wildlife Management y mas lo wordo trata a base di e experiencia di cada aeropuerto cu ta participa. E conocimento y experiencia cu lo wordo comparti ta djis un di e hopi beneficionan pa cada aeropuerto participando y ta uza e oportunidad unico aki pa trata tambe e problemanan cu nan ta encontra y na mes momento comparti experencianan exitoso pa crea manualnan di bon practica cu lo wordo uza pa aeropuertonan rond mundo.