Lider di MAS kier contesta di minister riba deal cu doño di compania cu a lease helicopter cu Aruba

Posted on 09/18/2023 10:05 am AST | Updated on 09/18/2023 10:07 am AST

ORANJESTAD – Parlamentario Marisol Lopez Tromp, di partido MAS a manda un lista di pregunta pa minister Rocco Tjon di husticia, riba e caso di doño di compania cu a lease e helicopter di polis, a entrega su mes na DEA na Merca debi na acusacion di narcotraficante. E parlamentario ta referi su pregunta basa riba e declaracionan cu a keda publica den medio internacional y local (incluyendo noticiacla.com). Awe mainta mientrastanto e minister encuestion ta tene un conferencia di prensa riba e tema. 

E CASO

Manera ta conoci, ayera a bira conoci cu e propietario doño di e compania Sociedad Aérea de Ibagué SAS (SADI) cu a lease un helicopter cu KPA na Aruba na 2019, Carlos Eduardo Restrepo Osorio, a entrega su mes na autoridad Mericano, unda cu e ta wordo acusa di traficacion di droga. Mientras cu e caso a tuma lugar na juni ultimo, ta apenas e weekend aki e portal di noticia El Colombiano a publica e informacion.

HELICOPTER PA ARUBA

Tabata na maart di 2019 cu e minister di husticia di Aruba di e tempo ey Andin Bikker a firma un MOU cu e empresa Colombiano SADI, di e mesun persona en cuestion pa un servicio di helicopter na Aruba. Despues tabatin problema cu e helicopter pa loke ta e acuerdo riba suministro di combustible pa e helicopter. Noticiacla no por a verifica independientemente cu si e helicopter cu ta den servicio aworaki, ta di e mesun compania of si mientrastanto esaki a cambia. A haci intento pa haya reaccion di minister di husticia Rocco Tjon, pero esaki no tabata exitoso. Si ainda e Aruba ta lease e helicopter y si esaki ainda ta di e compania SADI, no ta conoci si esaki por tin consecuencia pa e lease.  

  • Varadero
  • Powered by SETAR