Bermudez: CFT ta satisfecho con gobierno ta anda cu presupuesto 2015

ORANJESTAD – College Financieel Toezicht ta satisfecho cu e forma con gobierno ta andando cu e presupuesto 2015. Por lo menos, segun un declaracion verbal cu minister Angel Bermudez a sostene cu e secretario di CFT, Kees van Nieuwamerongen. Durante su presentacion awe mainta, e la lesa e declaracion textualmente na hulandes. E la dicidi di haci esaki, siman pasa ora cu tabatin tanto discusion cu si CFT ta di acuerdo y cu si Aruba ta cumpliendo cu e meta. Y segun Bermudez su discurso awe mainta, CFT ta bisa pa ‘sigui asina’.

KEES VAN NIEUWAMERONGEN

Bermudez, specificamente a puntra van Nieuwamerongen, si su interpretacion tabata corecto. Y e contesta di van Nieuwamerongen tabata: “ Si bo logra bo meta pa e aña aki y si e ta realistico y realisabel, e ora bo ta cla. Asina simpel e ta” van Nieuwamerongen a cuminsa na bisa. “E no ta asina cu mester tin un nota di cambio aworaki. No. E meta ta 3.7 y si bo logra esey cu e medidanan actual, perfecto. E ora nos no ta papia mas”. Segun e secretario “ e punto ta solamente cu aworaki nos ta en busca di un grip of casonan cu ta trankilisa nos. Pesei nos ta teima riba un liña di tempo, y un raportahe di cuartal. Pasobra e ora nos por bisa cu nos ta riba e bon caminda, riba e schedule, of e entradanan ta riba schema. E ora nos no tin precupacion cu e 3.7 no ta wordo logra. Pues sigui asina” Kees van Nieuwamerongen a finalisa bisando, segun Bermudez su declaracion, lesando esaki textualmente den parlamento.