Arends: Ta di aplaudi ora un persona of organisacion por reconoce y siña di nan errornan

ORANJESTAD – “Mi ta na altura di e premio unda Inspectie Volksgezondheid Aruba (IVA) a sali ganado door di Instituto di Briljante Mislukkingen cu a organisa nan di nuebe edicion di e "Briljante Mislukkingen Award' na Leiden. Ta trata di un premiacion cu un instancia ta haci ora cu nan a bay ehecuta algo, cu ta resulta despues robez, pero di cual nan ta siña di dje.  Den e caso aki ta importante pa reconoce 3 aspecto importante. E prome ta cu e ta di aplaudi ora cualkier persona of organisacion por tin e humildad di reconoce nan errornan pero mas ainda ora ta sinti motiva pa siña di nan errornan”. Asina e mandatario encarga cu adulto mayor, Ursell Arends a reacciona pa Noticiacla riba e noticia cu Inspeccion di Salud di Aruba a haya un premio basa riba un fayo cu nan a siña di dje algun tempo atras. 

DIFERENCIA ENTRE EHECUCION Y MANEHO

Segun e mandatario, e segundo aspecto den e asunto aki ta cu mester tene bon cuenta cu e diferencia entre ehecucion (uitvoering) y maneho. Den e caso specifico aki IVA ta un insitucion di ehecucion cu no ta carga responsibilidad di maneho. Pa un maneho ta efectivo e ta depende hopi di e ehecucion. Di mes manera evaluacion y posibel errornan di ehecucion tin impacto riba efectividad di maneho. Esaki ta motibo pakico ta hopi importante pa tene e cooperacion y comunicacion entre ehecucion y maneho estrecho.

HABRI PA RICIBI RELATO Y DOCUMENTACION

Den e caso aki, como Minister responsabel di maneho di casnan di cuido, sr Arends a sigura di ta keda habri pa risibi relato y documentacion di e errornan haci y puntonan di mehoracion di parti di IVA. “Exploitatie vergunning ta cadece di mi atencion mirando cu mayoria casnan di cuido no tin ni nunca a haya, incluyendo SABA”. E ta sigui bisa cu te na e momentonan aki a otorga 6 exploitatievergunning. Per 1 October 2023, un total di 10 cas di cuido lo tin nan exploitatievergunning. N”os ministerio su meta ta pa logra cu tur centro di cuido tanto subsidia dor di Gobierno of particular por logra haya nan vergunning” e minister a finalisa bisando.