DIMP ta tuma pasonan importante pa reduci retraso den procesamento di obhecion

DIMP ta tuma pasonan importante pa reduci retraso den procesamento di obhecion

Posted on 09/15/2023 10:03 am AST | Updated on 09/15/2023 10:04 am AST

ORANJESTAD – Departamento di Impuesto (DIMP) a bin ta anuncia durante e ultimo simannan e esfuersonan cu a wordo haci riba tereno di cobransa di impuesto y compliance durante e prome mita di aña y ta duna un bista den e trabaonan cu ta wordo haci pa reduci e retraso den e procesamento di obhecion (bezwaar). Aunke tin un trabou grandi cu mester wordo haci ainda, e trabao ta avansa den un ritmo constante y di un manera structura cu un norma pa procesa 3.000 carta di obhecion pa luna.

DETERMINA PA ELIMINA RETRASO

E retraso den e procesamento di e cartanan di obhecion a pone cu contribuyentenan te ainda ta den espera di un contesta di Inspector. Departamento di Impuesto ta compronde e preocupacion di e contribuyentenan y ta den pleno ehecucion di un plan structura pa atende cu e retraso aki. Aunke e retraso ainda no a wordo elimina completamente, e funcionarionan di Departamento di Impuesto ta determina pa optimalisa e servicio y reduci e tempo di espera. A tuma algun medida pa asina por aumenta e capacidad di procesamento y reduci e tempo di espera di e contribuyentenan.

Departamento di Impuesto a logra avansenan importante den reduccion di retraso den procesamento di restitucion y ta keda comprometi pa reduci e retraso den procesamento di “bezwaar” tambe.

  • Powered by SETAR