Bermudez: Presupuesto 2015 ta corecto y ta cumpli cu metanan

ORANJESTAD – E presupuesto 2015 ta corecto y lo cumpli cu e metanan poni pa gobierno di Aruba. Esaki ta e comentario principal di minister di finanza Angel Bermudez awe mainta den parlamento.” Pasobra e cifranan aunke no definitivo, di entrada y gastonan ta indica cu te cu awe, y decisionnan tuma, nos ta riba e ruta di presupuesto cu ta resulta den un deficit di 3.7%” Bermudez a sigui bisa. Mes momento e ta admiti cu e plafond di 1350, ta ‘un camisa di forza’, manera cu un parlamentario a comenta anteriormente. Citando un combersacion verbal cu e secretario di College Financieel Toezicht, Kees van Nieuweamerongen, e ta sigura cu e la haya e confirmacion cu te hasta CFT ta confortable cu e presupuesto manera cu e tabata.

INTERPRETACION DI E PROTOCOL

Segun e mandatario, tin diferente metodo di interpretacion. E mandatario ta mustra cu mester wak kico ta e meta y proposito di e protocol. “ E meta di e proposito di e protocol ta, cu mester cambia concepto di un presupuesto statico pa un dinamico. Pesey tur instancia mester ta apto pa durante aña, por manage bo situacion financiero, y no na final cu wijziging” Bermudez a bisa. Ademas, segun e mandatario, pa Hulanda, e ehecucion di presupuesto ta relevante. Pesey nan ta boga pa drecha e administracion financiero.

CARTA DI PARLAMENTO

E mandatario a trata e asunto di corespondencia entre gobierno y parlamento (diabierna ultimo), y a bisa cu e ta comfortable cu e loke ta e presupuesto. “Sra Lopez, bo a vocifera si mi ta confortable (cu e prespuesto 2015), mi a confirma esey pasobra e cifranan, -aunke no definitivo-, di entrada y gastonan ta indica cu te cu awe, y decisionnan tuma, nos ta riba e ruta di presupuesto cu ta resulta den un deficit di 3.7%”. E mandatario ta uza como punto di salida, e 24 desisionnan y e ruta cu a wordo defini den e asina yama proyecto multiannual (meerjarenrekering) . “ Importante ta e deficit. Esey ta e indicado si bo ta yega na e presupuesto balansa” Bermudez a finalisa bisando.

NORMANAN

Segun Bermudez, e norma cu gobierno a pone pa e presupuesto, ta-3.7% , pa otro aña e baha cu 2%, pa e yega na .5% na 2018.” Loke mi sa, tur loke a wordo dicidi, mi tin cu conclui cu nos ta riba e ruta. Esey no kier men cu bo por keda di haci nada.” Bermudez a bisa