Kamminga: Pasenshi di partido VVD ta cabando cu gobierno di Aruba riba situacion di RAFt

DEN HAAG – Pasenshi di partido VVD (partido mas grandi di coalicion na mando na Hulanda) ta cabando cu (gobierno di) Aruba pa loke ta e asunto di RAFt. Asina miembro di e partido VVD, Roelien Kamminga a bisa secretario di estado Hulandes Alexandra van Huffelen diaranson durante tratamento di presupuesto supletorio pa BZK. “Presidente, e pasenshi di VVD ta cabando mientrastanto. Y realmente, e iritacion riba esaki ta aumentando” Kamminga a sigui bisa. “Sigur si mi tende tur e declaracionan di prome minister riba e tema, y e ora mi kier men minister presidente di Aruba”, e miembro di Tweede Kamer a clarifica.

HOPI CLA

Si tabatin duda, e parlamentario Hulandes a clarifica esaki un biaha mas:”Laga mi ta hopi cla. Pa loke ta trata VVD, pa loke ta trata e regla di bon supervision pa medio di un Rijkswet, tabatin palabracion pa cu e discusion aki riba e extencion di e prestamo aki.  Esey nos a bisa anteriormente caba y pa cual nos a entrega un mocion cu colega van de Berg” Kamminga a sigui bisa. “Mi a scucha e secretario di estado bisa cu esaki tambe ta un condicion crucial p’e, pero mi kier a check cu ne si e ta un condicion concreto , pasobra ta ranca si cu e dossier aki, y si mi tin cu kere loke ta scirbi den (e corant) Antiliaans Dagblad, e ora ta parce cu lo tin caba un tipo di solucion hybrido, y mi ta hopi curioso pa sa con esaki lo bira”. Cu esaki e parlamentario ta cuestiona si e gabinete ta wantando na e palabracion cu Aruba cu mester di un Rijkswet, pa awor bin tende cu ta papiando riba un otro areglo, den forma di esun cu Aruba a sugeri recientemente, esta esun hybrid. Ademas e tabata kier a sa kico tabata e minimo cu mester tabata para den e Rijkswet pa cumpli cu e palabracion. Despues e secretario di estado a contesta e pida ey bisando cu e no por bay den tur condicion, pero sigur 2 cu ta crucial, cu ta cu e mester tin e normanan palabra, y cu mester tin un tipo di supervision, manera cu tin awor cu CAFt. Kamminga tabata kier sa con Tweede Kamer lo a wordo envolvi pa cu e control segun e contenido di e Rijkswet.

RIJKSWET IMPONE PA HULANDA

Segun Kamminga, e reformanan ta essencial pa drecha e situacion, pa cual mester di e Rijkswet. “Solamente cu e reformanan lo tin espacio duradero pa e economia, pa desaroya y pa crece mas hopi. Ey ta unda cu mi preocupacion ta”. Ademas e la mustra su frustracion pa cu e pensamento eroneo cu Hulanda lo ta imponiendo algo. “Mi ta blo tende cu Rijkswet lo ta impone desde Hulanda, y esey mi kier desmenti. Mi a bisa esey caba y mi ta lamenta berdaderamente cu un ley di consensus di Reino, cu segun mi ta un vehiculo hopi bon pa haci hunto unda cu hunto bo ta haci palabracionan cu ta masha usual den un relacion di cooperacion, sigur den un relacion madura, pa awor ta menasa di bira un instrumento pa determina ken ta hefe, y esaki mi ta realmente lamenta”, Kamminga a finalisa bisando. Por scucha su declaracion AKI.