AHATA: Augustus tabatin menos camber di hotel ocupa y menos na entrada pa camber

ORANJESTAD -  Aruba Hotel & Tourism Association (AHATA) ta acumula e cifranan di ocupacion y prijs di hotelnan tur luna y CEO di AHATA, Tisa LaSorte, ta anuncia cu na Augustus a experiencia un reduccion di cambernan di hotel ocupacion atrobe y tambe reduccion di RevPAR, osea a gana menos na entrada pa camber. 

AUGUSTUS 2023:

-        Ocupacion: E grado di ocupacion tabata 75%; cual ta 9% menos cu grado di ocupacion na Augustus 2022 y 13% menos cu na 2019. 

-        ADR: E balor averahe di cada camber bendi tabata $307.83; un aumento di 6% compara cu Augustus 2022.

-        RevPAR: E entrada averahe pa tur camber disponibel tabata $231.95 cual ta un reduccion di 3% compara cu 2022. RevPAR ta e indicador di e resultado financiero prome cu desconta gastonan operacional y impuesto.

JANUARI – AUGUSTUS 2023:  

-        Ocupacion: E ocupacion averahe di prome 8 luna tabata 79%; un aumento di 6% compara cu e mesun temporada na 2022. (Nota: Den prome kwartaal di 2022 Aruba su turismo tabatin efecto di COVID).

-        ADR: E balor averahe di cada camber bendi tabata $351.88; cual ta 14% mas cu mesun temporada na 2022.

-        RevPAR: E averahe di prome 8 luna tabata $276.63; 21% mas compara cu e mesun temporada na 2022. 

PROYECCION:

Proyeccion actual pa ocupacion averahe di hotel pa September ta 68%, Oktober ta 70%, y November ta 73%. Expectativa pa ful aña 2023 su ocupacion ta 73%, cual ta representa un reduccion di 13% compara cu e averahe di aña 2019. 

TIMESHARE:

Ocupacion na propiedadnan Timeshare tabata 81% na Augustus 2023.