Tratamento presupuesto 2015 ta continua diamars mainta

ORANJESTAD – Tratamento di presupuesto no a termina awe manera cu a spera inicialmente. Ora cu a cuminsa cu e tratamento di e ultimo dos ministerionan (finanzas y asuntonan general), ya tabata pasa di 3’or di atardi, enves di 11’or di mainta cu e tabata poni pa cuminsa. Varios factor a pone cu e no por a cuminsa prome. A trata e prome serie di orado den e prome tanda, y despues cu e ultimo orado a hiba palabra, presidente di parlamento a sera e tratamento di e caso y a schors e reunion te mayan mainta 8’or.

CONTESTACION

Awor ta sigui e contestacion di e ministernan Angel Bermudez (finanzas) y Eman (asuntonan general) pa finalmente pasa pa votamento di e presupuesto 2015. Esey ta programa pa cuminsa pues 8’or di diamars mainta.

ADAPTACION DI PRESUPUESTO

E interes tabata grandi awe pasobra tin cu mira ainda si na final di e tratamento di e presupuesto, si gobierno ta adapta e presupuesto segun criteria di College Financieel Toezicht, manera cu a wordo pidi, of si e ta tene su mes na su palabra di siman pasa diabierna, esta cu ta laga e presupuesto manera cu e ta, argumentando cu a haci basta adaptacion caba y cu ta cumpliendo cabalmente cu tur palabracion haci. Riba e punto aki, tin varios observacion y analisis y interpretacion.