Señora a duna luz den edificio di AZV awe merdia!

ORANJESTAD – Un señora awe merdia a duna luz den e edificio di AZV, ora cu e la bin pa atende algo di AZV. E señora na estado e momento ey, diripiente a cuminsa haya ‘weeën mas fuerte (e tabata hayando weeën prome cu e la yega parse). Personal di AZV mesora a yama ambulance, y mientrastanto e la wordo atendi pa personal di AZV den un spreekkamer di e compania. Pasobra e parto tabata andando caba, AZV a yama docter Tjon Sie Fat (e ta den servicio di AZV), pa yuda cu e parto. Mientrastanto e ambulance a yega, y un rato despues e baby (mucha muhe) a nace.

BABY TA BON

Di informacion cu NoticiaCla.com a logra haya, tanto e mama y e baby ta hopi bon y tur hende e momento ey obviamente tabata masha feliz. E baby mientrastanto a bay hospital, y poco despues e mama tambe a bay, pero den un otro ambulance. E mama, despues di e parto a haya felicitacion di parti di e trahadonan y e docter y e broeder di ambulance a haya un caluroso aplauso.

MOMENTO BUNITA

Pues un momento bunita, in usual, cu sigur ta uno pa e bukinan di recuerdo pa tanto e famia, y tambe pa e personal di AZV, cu no tur dia ta haya nan mes den un situacion unda cu un mama ta duna luz den e edificio mes. NoticiaCla.com ta manda palabra di pabien na e mama feliz y pabien cu e baby.