Corte di apelacion di caso Ennia contra Ansary a duna veredicto parcial

WILLEMSTAD - Awe, Corte a dikta sentensia den e apelashon di e kaso di Ennia kontra Ansary i otronan, despues ku riba 13, 14 i 16 di mart di e aña aki a selebrá seshonnan di Korte. Den su sentensia di 29 di novèmber 2021, Korte di Promé Instansha a bai di akuerdo ku e demandanan di Ennia te un suma di mas ku NAf 1 bion. Korte di Apelashon a tuma desishonnan tokante di parti di e demandanan di Ennia. Pa por desidí tokante di e sobrá demandanan, ta rekerí investigashon di un eksperto independiente. Ademas, e partinan lo mester entregá informashon adishonal.

KONTEKSTO

For di yüli 2018, e medida di emergensia respekto di Ennia ta na vigor. Banko Sentral di Kòrsou i Sint Maarten ta enkargá ku e realisashon di esaki, i a inisiá e prosedura aki ku meta di solushoná e problema di solvensia ku Ennia ta presentá. Kon grandi e défisit di solvensia ta, riba su mes no ta e tópiko di e prosedura aki; ta trata di indemnisashon di daño respekto di algun pòst i suseso spesífiko. Ennia ta akusá e akshonista (Parman International) i èks- ehekutivonan i komisarionan (Ansary i otronan) di a aktuá ilísitamente pa ku kompanianan ku ta pertenesé na e grupo Ennia. Sigun Ennia, for di e momento ku e grupo Ennia a wòrdu tumá ofer dor di Parman International – ku Ansary ta ehekutivo/akshonista mayó di dje – na fin di 2005/kuminsamentu di 2006, e grupo Ennia no a wòrdu dirihí di akuerdo ku e karakter spesífiko di kompanianan di seguro i e reglanan di supervision asosiá na nan. Den e konteksto aki, sigun Ennia a hasi gastunan eksesivo indebido, komo pagonan (di dividènt), donashonnan, salarionan i bónùsnan, i a deprivá Ennia inhustamente di ganashinan di invershon.

E VEREDIKTO DI KORTE DI APELASHON

GENERAL

Korte di Apelashon ta menshoná ekstensamente e kriterionan ku ta relevante pa e evaluashon di e demandanan. E ehekutivonan i komisarionan di kompanianan di Ennia ku ta ehersitá un kompania di seguro (e aseguradónan) mester ehersé nan tareanan ku koutela respekto di e interesnan di e benefisiarionan. Esaki tambe ta apliká na e ehekutivonan i komisarionan di Ennia Holding i Ennia Investments pasobra e aseguradónan ta dependé di nan.

RESPONSABILIDAT KOMUN

Ennia ta alegá ku tur partinan demandá ta komunmente responsabel pa tur e dañonan ku e ta demandá, debí ku a aktuá den grupo. Korte no ta bai di akuerdo ku esaki, ya ku no ta kumpli ku e rekísitonan di lèi ni hurisprudensia di Korte Supremo.

Invershon den S&S i plataformanan petrolero

E invershon den e kompania merkano S&S, ku Ansary ta ehekutivo i akshonista di dje, riba su mes a generá un rendementu rasonabel. Sin embargo, Korte ta huzga ku Ansary i otronan ta responsabel pa e dañonan ku a okashoná komo konsekuensha di un transakshon spesífiko na 2014, den e marko di e invershon den S&S. Den e kaso ei, e akshonnan di Ennia den S&S a wòrdu bendé na otro kompania propiedat di Ansary a kambio di un pagaré (promissory note). E transakshon aki a perhudiká e interesnan di Ennia severamente, debí ku e prèis di kumpra pa Ennia a wòrdu fihá riba un balor muchu abou. Korte ta estimá ku e daño riba e punto aki ta USD 117 mion (suma será). Korte tambe ta huzga ku Ansary i otronan ta responsabel pa e dañonan ku a okashoná komo konsekuensha di e invershon na 2009 den plataformanan petrolero di S&S. E invershon aki no ta apropiá ni responsabel pa un empresa komo Ennia. Korte ta estimá ku e daño riba e punto aki ta mas ku USD 11 mion.

PAGONAN (DI DIVIDÈNT)

Korte mester evaluá si Ennia su kapital tabata sufisiente pa por konsiderá varios di e pagonan (di dividènt) hasí na e akshonista (Parman International) entre 2009 i 2015 pèrmisibel.

E balor di Mullet Bay, un parsela di tereno na Sint Maarten ku Ansary a aportá na Ennia, ta di importansha desisivo den e evaluashon aki. Mullet Bay tabata un resòrt di golf i un lokalidat di timeshare ku a keda daña dor di orkan Luis na 1995. A sobra un hotel so, i e sobrá di e tereno no a wòrdu desaroyá mas. Mullet Bay a wòrdu inkluí den Ennia su kuentanan anual pa sumanan haltu. E partinan ta disputá e balor di Mullet Bay. Korte ta haña ku den e añanan ku a hasi e pagonan (di dividènt) ku Ennia ta menshoná, Mullet Bay tabata inkluí inkortektamente den e kuentanan anual pa un balor ku a wòrdu derivá di balorashonnan demasiado limitá di un taksadó. Pa tal motibu, no por asumí ku e pagonan (di dividènt) a wòrdu hasí di konformidat ku lèi i e estatutonan. Korte ainda no por kontestá e pregunta si Ansary i otronan ta responsabel pa e dañonan, ya ku no por deskartá ku, si tabata tin un balorashon sólido, e pago (di dividènt) di algun suma sí por a tuma lugá. Konsekuentemente, Korte primariamente ta haña nesesario optené informashon eksperto adishonal tokante di e balor ku den e añanan relevante por a atribuí rasonabelmente na Mullet Bay. Si akaso ta resultá ku Ennia den e marko di e sobrebalorashon di Mullet Bay a hasi mas pagonan na su akshonista ku tabata legalmente i statutariamente pèrmisibel, e ora ei, Korte lo huzga ki suma lo mester paga (bèk) na Ennia.

GASTUNAN EKSESIVO

Korte ta huzga ku pa kualke gastu ku ta hasi komo donashon òf gastunan di biahe i estadia ku ta mas haltu ku promedio, e promé rekisito ta ku e kapasidat finansiero di Ennia mester ta sufisiente pa e gastu en kuestion. Sin embargo, tambe den kaso ku e kapasidat ta sufisiente, semper ta konta ku tur gastu mester ta hustifiká den e marko di e interesnan di Ennia.

Korte ta konsiderá ku Ansary i otronan ta responsabel pa algun pòst relashoná ku donashonnan (solamente na un kousa privá i di ningun interes pa e kompania), servisionan prestá ku di ningun forma ta relashoná ku e eksplotashon di Ennia, asistèntnan personal di Ansary i 'empleadonan spoki', i gastunan pa avionnan privá. Den su sentensia, Korte ya kaba a konsiderá un suma (en totalidad) di mas ku 25.8 mion NAf atmisibel.

Tokante di e kompensashon di e komisarionan i nan gastunan di biahe i estadia lo forma un huisio ora e eksperto independiente ta entregá su rapòrt di taksashon di Mullet Bay.

Tin algun punto ku ainda ta rekerí mas klarifikashon i debate. Lo tin oportunidat pa hasi esaki na momentu ku e partinan mag di reakshoná riba e rapòrt di e eksperto.

KONKLUSHON

Awor, e partinan lo haña oportunidad promé pa ekspresá nan punto di bista tantu riba e persona di e eksperto ku lo wòrdu nombrá pa un taksashon di Mullet Bay den e periodo relevante, komo riba e formulashon di e pregunta ku lo wòrdu hasí. Den e sentensia aki, Korte por a duna klaridat pa loke ta trata parti di e demandanan di Ennia kaba, esta 117 mion USD (suma será), (mas ku) 11 mion USD, i 25,8 mion NAf. NOTA: E texto ta scirbi den Papiamento fonetico di Corsou.