‘Suki’ Croes ta perde caso contra minister Hooyboer

(CORRECCION)

ORANJESTAD – Huez no ta haya cu e investigacion andando contra e maestra di Scol Basico Kudawecha Suhail ‘Suki’ Croes tabata incorecto. Como tal den un sentencia verbal awe, e la dicta cu e investigacion lo continua. E investigacion andando mester determina si Croes a actua incorecto contra un mayor di un alumno, pa cual e por wordo suspendi y retira si e investigacion demostra esey.

REPRESENTACION

E caso mes a tuma lugar awe mainta, unda cu minister di enseñansa Michelle Hooyboer tabata representa pa abogado Doris Canwood, mientras cu Suhail Croes tabata representa pa abogado Hendrik Croes.

CONFIRMACION CASO

NoticiaCla.com a tuma contacto cu e mandatario, cu a confirma e ‘victoria’, pero a opta pa no duna mas comentario te ora cu e mira e veredicto riba papel y por analisa esaki miho. Abogado Croes (contra partido), no tabata disponibel pa comentario. Den curso di mayan lo tin mas informacion riba esaki.

CASO MES

E caso a keda entama pa e maestra, den un intento pa para e investigacion andando contra su persona, ya cu e ta considera esaki robes. E investigacion a cuminsa unabes cu a keha e maestra pa a actua incorecto cu un mayor di un alumno algun tempo pasa. Su actuacion lo no tabata esun corecto, pa cual basa riba un keho di e mayor, departamento di scolnan publico a recomenda pa suspende e maestra, pendiente un investigacion. E caso a bin dilanti parlamento unda cu despues di a trata esaki, e mandatario a dicidi pa no suspende e maestra, pendiente e investigacion, pero si a ‘hou aan’ e carta di suspension. 

ACLARIACION

Den e raportahe inicial, NoticiaCla.com a raporta na final di e articulo cu e caso tabata trata e paramento di e carta di suspension. Esaki sinembargo no ta corecto. E mester ta cu a cuminsa e caso pa para e comision di investigacion.