Reinkemeyer: Presentadornan di Enfoke a lansa acusacion serio contra minister Tjon sin prueba

ORANJESTAD – Presentadornan di e programa di radio Enfoke, Patrick Paskel y Nelson ‘Speed’ Andrade a haci acusacionan serio den direccion di actual minister di husticia Rocco Tjon. Asina abogado mr Milaynie Reinkemeyer a cuminsa e defensa di su cliente Tjon dialuna atardi den e caso cu e actual minister a entama contra e dos presentadornan di e programa radial Enfoke Patrick Paskel y Nelson Andrade. Ta trata di acusacionan cu Tjon algun aña pasa den calidad di agente policial e tempo ey tabata envolvi aden como testigo y sospechoso den un caso serio policial, pero cu sr Tjon (awe den funcion di minister:red)  awor ta desmenti. Sr Tjon a exigi un rectificacion di e dos presentadornan pa nan acusacionan haci, cuminsando cu e prome acusacion riba 1 di augustus ultimo y sigui riba otro dianan despues. Pero como cu e dos presentadornan a nenga, e mandatario a hiba nan corte. 

SCUCHA TESTIGO

Abogado colega di mr Reinkemeyer esta mr Anthony Ruiz a cuminsa na informa e huez cu su cliente ta rechasa pa scucha testigo (un peticion di parti di e contra partido) y cu e caso aki pues no tin lugar pa esey. E huez tratando e caso en cuestion a tuma un break di 15 minuut pa pensa un rato y despues a bay di acuerdo riba e peticion pa nenga testigo. Segun abogado Reinkemeyer, e contra partido kier crea e impresion cu nan cliente (Tjon:red) lo ta sospechoso den un caso policial y culpable di cierto acusacion y cu ademas nan cliente lo a keda deteni brevemente den e caso en cuestion. Lo ta tin un orden di aresto y cu tur dos presentador a sigui riba e tema ey. Acusacionan serio manera cu lo a detene Tjon,y cu lo a paga polis pa cambia declaracionan, tur ta acusacionan serio cu Tjon ta desmenti. 

ACUSACION SIN BASE

Segun abogado Reinkemeyer, e acusacionan haci ta sin base y cu e presentadornan no a actua como periodista cuidadoso. Ningun di e acusacionan por a wordo confirma segun e abogado. Al contrario segun e abogado, e dos presentadornan tabata pretende cu tabatin documentonan firma, y hasta potret como prueba. Pero nan no a presenta esaki den corte. Segun e abogado, e dos presentadornan a sigui cu mas storia dia 2 di augustus di e aña aki, y e biaha aki cu sosten supuesto. E unico meta di e dos presentadornan tabata pa ‘caba’ cu e actual minister en cuestion segun e abogado. Y asina e dos presentadornan a sigui cu nan acusacionan e siguiente dia esta dia 3 di augustus ultimo.  Esaki, no obstante cu Tjon a desmenti tur cos riba su pagina di Facebook. Segun Reinkemeyer e presentador Paskel a bay asina leu di bisa cu Tjon tabata gaña, usando un articulo cu a keda publica algun aña prome di un entrevista cu e tempo ey comisario di polis Vanesa Kock, cu e tempo ey ainda tabata casa di Tjon, riba e portal Caribisch Netwerk. Como tal, Tjon dia 4 di ausgustus ultimo, a demanda un rectificacion di e dos presentadornan di e program Enfoke. Pero no solamente cu e dos presentadornan no a rectifica, sino pa sorpresa, dia 7 di augustus, a sigui aun mas acusacion. A bin cu e ponencia di e presentadornan, segun e abogado, cu ta solamente ‘pregunta’ nan (e presentadornan:red) wstabata haci publicamente na sr Tjon y cu sr Tjon mester a contesta si ta berdad of no. Abogado Reinkemeyer a sigui mustra cu un periodista mester haci su debido investigacion prome cu e haci acusacionan serio asina. Sigur si e ta afecta e bida di e persona contra ken e acusacion ta wordo haci. Reinkemeyer ta haya cu mester confronta e persona en cuestion pa duna su banda y hunto publica e informacion en cuestion. Den e di dos ronda, colega abogado mr Ruiz  a bisa cu ‘e flie no ta subi’ cu ta ‘djis’ pregunta e dos presentadornan tabata haci, pasobra dado momento Paskel lo a bisa specificamente cu Tjon tabata un sospechoso den un caso y cu e meta specifico tabata pa trece credibilidad di nan cliente (Tjon:red) den duda. Loke ta e problema ta cu e declaracionan ta haci den un programa hopi scucha y cu e programa por wordo scucha ki ora cu ta y ta haya asina hopi atencion y un acusacionan asina ta keda zona den comunidad. Ademas, segun Ruiz, e dos presentadornan a bisa repetidamente cu nan tin prueba y cu por demonstra nan punto, pero cu den corte nan no a trece ni un prueba di nan acusacionan. Mientras cu nan no tabatin prueba, diripiente a haci mencion di un polis y tambe un miembro di Landsrecherche pa nomber, indicando cu asina nan a haya nan prueba cu tanto ta wordo referi na dje. Ruiz ta considera cu loke e dos presentadornan a mas bien presenta ‘bladvulling’ pues cos pa yena ora, trece redashi y sisheria, pasobra den corte nan no a mustra ningun prueba. Tambe reaccionando riba acusacion di abogado di contra partido, Wever a sigura cu e partidonan en cuestion (Paskel y Andrade) tabatin suficiente posibildiad pa papia cu Tjon, pero a opta pa no haci esaki. Na final, ora cu a keda presenta cu e documentacion di OM cu Tjon, tabata testigo, a mustra cu esaki tabata den un contexto diferente di un otro caso. Huez a cera e caso y ta dicta sentencia dia 4 di October proximo. NOTA: Abogado Ruiz, den e caso aki no a haya permiso di su cliente pa comparti e pleidooi den e caso aki.