Minister Tjon ta topa presentadornan di programa Enfoke den Corte awe tardi

ORANJESTAD – Presentadornan di e programa radial y riba red social di 24ora.com (Headlines Group) ‘Enfoke’, Patrick Paskel y Nelson “Speed’ Andrade ta topa minister di husticia den corte awe dialuna merdia. E mandatario a dicidi di hiba e dos presentadornan corte pasobra nan no kier a rectifica un supuesto declaracion riba su persona riba algo cu a pasa den pasado tempo cu e tabata ainda den funcion di KPA como agente policial. E mandatario a considera esey como mentira y calumnia y e exigi pa e dos presentadornan rectifica. Nan no a haci esaki pa cual e mandatario a opta pa hiba nan corte. Noticiacla a ricibi notificacion oficial di Corte siman pasa diamars, cu e caso lo tuma lugar we dialuna atardi, 11 di September 2023.  

REACCION PRESENTADORNAN DI ENFOKE

Den un reaccion siman pasa, e presentadornan a declara lo siguiente pa Noticiacla: ”Nos ta insisti di a haci e minister pregunta si e tabata sospechoso na aña 2013 den un caso interno di Cuerpo Policial Aruba? El a contesta riba facebook cu "no" y nos a publica su contesta mesora, dunando e oportunidad pa ventila su opinion” nan ta cuminsa na bisa. “ Despues, ta resulta cu na 2015 su casa, Vanessa Tjon-Kock como comisario di polis a declara e mesun cos, esta cu tin tres polis bou di investigacion pa falsificacion di proces-verbaal. Nos a bolbe puntra, pasobra "caya ta papia" cu e tres polisnan ey tabata un tal Tromp, Oduber y Tjon. E mandatario a bolbe contesta cu e no tabata envolvi y nos a pasa su contesta”. Y finalmente e presentadornan ta bisa cu “ otro siman den corte, (abogadonan di Paskel y Andrade:red)  lo pidi pa scucha Vanessa Tjon-Kock como testigo, pasobra e tin cu bisa ken tabata e tres polisnan (recherche) bou di investigacion na aña 2013. “Tambe nos a pidi via LOB pa Ministerio Publico duna acceso na e zaak-dossier ey, den cuadro pa verifica integridad di e mandatario”, e presentadornan a finalisa bisando. Nan abogadonan ta David Kock, Demis Illes y Vito Carlo, mientras cu e minister en cuestion ta wordo representa pa abogado Anthony Ruiz. E minister (te ainda) no a contesta noticiacla.com riba nos peticion pa un reaccion.