Hopi autobus no a pasa control di trafico

ORANJESTAD - Di e 39 autobusnan cu a wordo controla, 7 no tabatin e documentonan necesario na ordo, pues a subi takelwagen y Polis a duna 12 proces-verbaal pa diferente delito na e chauffeurnan di varios autobus, asina Hoofdagent Robert Vos a resumi. Esaki tabata resultado di un control grandi cu a tuma luga entre 6or y 10or di mainta y tabata un accion combina entre Cuerpo di Polis y DTP, Departamento di Transporte Publico.

FAYONAN EXTRA

Hoofdagent Vos, kende ta Polis di Bario di Playa, a encabesa e accion cu tabatin “resultado positivo”. A subraya cerca e chauffeurnan di autobus tanto nan responsabilidad pa cu siguridad di nan clientenan como nan obligacion pa tin tur documento na ordo. A haya chauffeurnan cu no tabatin keuringskaart, seguro, prueba di pago di belasting (nummerplaat) y tampoco nan rijbewijs na ordo, pero tampoco no tabatin nan rijvergunning ni exploitatievergunning cu nan.

BACK UP PLAN

Cuerpo di Polis a prepara pa e eventualidad cu tabatin muchanan di scol den e autobusnan y a percura pa nan wordo hiba scol di biaha pa nan no wordo perhudica. Esaki tabata e prome control, pero lo sigui cu mas di e tipo di control nan asina riba medionan di transporte publico, incluyendo taxi y V-wagen tur rond di Aruba. Ta spera cu tur esunnan responsabel tuma bon nota di e documento y condicionnan menciona y cumpli tambe cu nan!