Boxdo retira Floyd Mayweather un biaha mas bek na Aruba

ORANJESTAD – E boxdo professional Mericano retira Floyd Mayweather (46) ta na Aruba atrobe pa un vacacion di algun dia. Cada bez cu e boxdo aki bishita Aruba e ta bira un noticia, cuminsando cu su avion priva cu ya ta hala atencion cu e nomber di dje asina grandi riba e avion. Tabata dos aña pasa na februari cu e tabata na Aruba, y prome cu esun, un aña prome. Cada bishita di dje ta bira un promocion pa nos isla, si tene cuenta cu e ta publica su bishita riba su Plataforma social Instagram cu tin casi 30 miyon siguidor mundial. Ultimo biaha e la publica varios potret di Aruba riba su pagina. E biaha aki ainda esey no a sosode aunke ta for di diasabra caba e avion ta na Aruba. E ta conoci como un di e boxdonan mas rico na mundo cu un balor di entre 560 miyon pa 1 biyon dollar Mericano. Manera ta conoci e gusta Aruba y tres aña pasa Aruba tabata number 13 di e 15 destinacionan vacacional cu el a bishita na 2020. E potret ta cortesia di 297 spotters.