Segun Ennia Aruba, nan ta bon para y no mester di e ayudo miyonario di Hulanda

ORANJESTAD – E ayudo financiero cu gobierno di Hulanda a pone disponible di 600 miyon euro pa companianan di seguro Ennia no ta conta pa Ennia Caribe Schade (Aruba) NV y Ennia Caribe Leven (Aruba) NV. Asina e oficina di Aruba a bisa diahuebs den un comunicado. Segun e oficina di Aruba, prensa Hulandes eroneamente a publica cu e ayudo ta pa saca e companianan di Ennia (Aruba, Corsou y St Maarten) for di nan problema financiero cu nan ta aden, y pa nan por keda solvente. Sinembargo, segun e oficina di Aruba, e ayudo no ta conta pa Aruba pasobra e situacion di Aruba ta bon. Ta lamenta e raportahe aki, pasobra ta duna impression cu e oficina di Aruba lo tin problema financiero. “E impresion ey no ta corecto. E situacion financiero di Ennia Aruba ta completamente na ordo” e comunicado a bisa. “Ennia Aruba no ta cay bou di e areglo di emergencia y supervision di Banco Central di Corsou y St Maarten, pero completamente bou di e supervision hopi estricto di Banco Central di Aruba y ta cumpli cu tur exigencia di solvencia di Banco Central”. Ademas segun e comunicado, ciranan publica recien riba portal di Ennia, aproba pa accountant, di e cifranan aunal di 2022 di Ennia Aruba ta demonstra cu e posicion financiero di Ennia Aruba ta hopi bon y cu e aseguro di Aruba ta den estado completo di por cumpli cu su debernan pa cu su aseguradonan y tur otro segurado y creditornan. Como tal, segun e comunicado, no ta berdad cu Ennia Aruba lo ta dependiente di e ayudo financiero di Hulanda di 600 miyon euro.