Encuesta di Noticiacla: 68% kier Gobierno di Aruba firma RAFt cu Hulanda

ORANJESTAD – Segun 68% di esnan cu a participa na e encuesta ultimo di Noticiacla, Gobierno di Aruba mester firma e ley di Reino pa supervision financiero, esta e RAFt envez di mantene e LAFt, cu ta e ley ‘local’ vigente actualmente. Y ora cu puntra kico e persona mes ta pensa di RAFt si nan ta pro of contra, 69% ta bisa cu nan mes ta pro. Mayoria di esnan cu a participa tabata di e sexo masculino di entre 55 pa 64 aña di edad y mayoria tabata for di Oranjestad y Noord. Un total di 567 persona a participa den e encuesta cu a cuminsa core diabierna siman pasa y a cera awe diaranson 6 di September 2023. 

RESULTADO

E encuesta tabata uno hopi simple, unda cu e unico meta tabata pa sa kico e usuarionan di Noticiacla ta pensa cu Gobierno mester haci pa cu e RAFt, esta firma of no, y kico e usuario mes ta pensa di e RAFt. A puntra nan obviamente si nan sa kico e RAFt ta contene, y aki un grupo aun mas grandi, 96% a sigura (segun e encuesta por lo menos) cu nan sa kico RAFt ta encera. Hopi hende a comenta cu si pero con por sa si e persona enberdad ta papia berdad etc. Pero mescos cu p.e. e hecho cu un persona ta sigura cu e ta bay vota pa tal y tal, ora cu e drenta den e hoki, e ta haci otro. Ademas, e ta un indicacion simplemente y tampoco scientifico. Interesante ta cu ta keda un grupo hopi chikito si di 3%, cu no ta importa y of no tin interes at all di kico gobierno mester haci of laga di haci. E por ta cu nan tin un motibo specifico. Pero realidad ta cu e encuesta aki no a duna e oportunidad pa motiva e contesta aki mirando cu e tabata un encuesta hopi simple e biaha aki. Den futuro cercano, e encuestanan lo bolbe ta mas extenso.