English: Reapertura refineria hopi dificil pero no imposibel

ORANJESTAD – E ta hopi dificil, pero e ta posibel. Esaki ta e punto di salida di un di e ex gerentenan di refineria Coastal/ El Paso, Nelson English awe mainta durante su presentacion na Parlamento. Dilanti e comision fiho di energia, presidi pa parlamentario Andin Bikker, English a mustra cu un ‘restart di e refineria, ta un caminda hopi dificil, pero posibel’. Informacion cu NoticiaCla.com ta haya, ta cu si tin boluntad y backing di gobierno, English lo por haya un eventual cumprado.

REUNION AWE MAINTA

Manera cu NoticiaCla.com a raporta awe mainta caba, e reunion cu e delegacion mericano a cuminsa pa 8:30am, unda cu e comision a haya un bista di kico por y kico no por. Cu un presentacion visual, English tabata hopi realistico, pero tambe cu un toke di speransa. Segun English, ora cu papia di un restart di e refineria, ta papiando mesora cu tin cu reconfigure pa di prome biaha, pa e bira un negoshi cu por sobrevivi.

DIFICIL PERO NO IMPOSIBEL

“E ta un sero hopi skerpi y dificil pa subi. Y mi ta papiando mas bien di un proceso di subi baranca grandi y dificil. Pero e ta posibel”. English a sigui bisa. Cu esey, e la duna parlamento un poco speransa, aunke limita y hopi chikito.