Segun encuesta na Hulanda partido mas grandi lo ta esun di Omtzigt sigui pa VVD y Pvda/GL

DEN HAAG – Den e prome encuesta politico despues di recess na Hulanda, e partido Nieuw Sociaal Contract (NSC) di Pieter Omtzigt a bira e partido mas grandi den un solo tiro. Segun e calculacion di asiento promedio, e partido ta mustra di tin entre 26 pa 32 asiento den Tweede Kamer. E unico partidonan cu ta bin na remarke pa esaki, ta VVD cu entre 22 pa 27 asiento y e combinacion di partido PvdA/Groenlinks cu entre 22 pa 26 asiento. Riba un distancia grandi, ta sigui PVV cu entre 12 pa 16 asiento y BBB  cu entre 11 pa 17 asiento. E partidonan cu ta cay atras ta D66 y CDA. Si den eleccion na 2021 D66 a logra 24 asiento, awor tin apenas 6 pa 10 asiento segun e encuesta. CDA cu tabatin 15 asiento den e ultimo eleccion, awor ta ked ana apenas entre 2 pa 6 asiento. CU ta stabil cu entre 4 pa 6 asiento. E partido cu mas a sufri di e entrada di NSC ta e BoerBurgerBeweging (BBB).