Van Huffelen a confirma cu a ricibi un carta di Aruba diabierna ultimo

DEN HAAG – Secretario di estado Hulandes Alexandra van Huffelen a ricibi un carta di Aruba diabierna. Esey e ministerio di relacionan interior y di Reino (BZK) a confirma diamars atardi (awe) pa Noticiacla. E contenido di e carta no ta conoci pa noticiacla, y pues no por deduci cu esaki ta cumpli cu e ultimatum relaciona cu un propuesta di RAFT. Inicialmente Noticiacla a compronde y publica cu esaki lo tabata e oferta referente RAFT pero despues a compronde cu secetario di estado Van Huffelen lo  propone Aruba pa ambtenaarnan di Hulanda i Aruba sinta hunto riba contenido di e carta. Si e ta e oferta mes, no ta conoci cuanto tempo lo dura prome cu Hulanda dicidi riba dje. Manera cu noticiacla a raporta siman pasa ainda, gobierno di Aruba a informa publicamente cu nan a manda un oferta, pero no a bisa ki dia y si esey tabata e oferta cu tabata falta. Esaki pasobra diahuebs atardi ora di Hulanda ainda, e oferta no a drenta cerca sra van Huffelen. Esaki pasobra ora cu e mandatario a papia cu Noticiacla atardi ora di Hulanda, e la sigura cu e no a ricibi nada ainda. Y cu tabatin un dia mas. 

CONTROVERSIAL OF NO?

Diaranson awor, mayan Tweede Kamer ta repasa e lista di temanan pendiente pa dicidi si nan ta wordo declara controversial of no. Unabez e lista ta cla, ta pasa pa votacion otro siman diamars, dia 12 di September 2023. Esey kier men cu pa otro siman diamars, ta haya sa di e tema di RAFt y refinanciamento di debe di Covid19 ta sigui wordo trata pa e gabinete actual, (lesa: van Huffelen), of si ta wanta esaki pa e proximo gobernacion cu sinta despues di e eleccion Parlamentario di november awor. Secretario di estado Hulandes a bisa Noticiacla diahuebs siman pasa den e programa Noticiacla LIVE cu si Tweede Kamer declara e temanan aki controversial, esey ta malo y cu tur cos ta para. Esey kier men primordialmente cu Hulanda no por ofrece Aruba refinanciamento mas cu interes abou y e tratamento di RAFt tambe ta para. Pero, e la indica cu e no ta mira cu Tweede Kamer lo para tur cos, ya cu den pasado recien a pasa un mocion unda cu ta trata e situacion di e islanan y cu e ta mustra bon. 

REUNION DIAHUEBS AWOR DEN PARLAMENTO

Diahuebs awor Parlamento ta continua cu e reunion riba e RAFt y ta premira cu aki por surgi mocionan sea pro of contra pa firma of no firma. Noticiacla mientrastanto tin un encuesta andando aworaki riba e tema di RAFt, unda cu e usuarionan di Noticiacla por participa. Pa participa, click AKI.