Ta teme cu deficit pa 2015 ta mas halto cu -3.7%

ORANJESTAD – E deficit presupuesta pa 2015 di pais Aruba por ta mas cu e maximo di -3.7% di e GDP. E miedo ey, medio sosteni y comparti pa pronostico di e.o. Fitch (4.2% GDP) y IMF (4.5%), ta motibo pa precupacion, segun e matutino Antiliaans Dagblad ta raporta, citando su fuentenan. Segun e matutino, e mesun preocupacion ta biba tambe awor na ministerio di asuntonan interno y relacionnan di reino hulandes.

WANTA DURO

Sigur awo cu gobierno di minister Mike Eman y minister Angel Bermudez ta wanta duro na e presupuesto 2015, sin ningun extra medida, y cu a avisa cu pa aworaki, esaki no ta necesario, no obstante recomendacionnan haci pa CFT (carta 10 april) citando 4 area, incluyendo e solidariteits tax. Esaki tambe ta den e protocol recien di 2 di mei. Ni despues di e advertencia diabierna di presidente di parlamento Marisol Lopez Tromp, esaki no ta bay sosode.

MAS MEDIDA

Informacion adicional cu NoticiaCla.com tin for di su propio fuentenan fidedigno, ta mustra cu enberdad e cifranan di debe, por ta mas halto cu e 3.7. E fuentenan fidefigno a confia na NoticiaCla.com cu enberdad, manera cu e fuentenan di AD a bisa, e cifra ta varia di entre -4 pa -5% di e GDP, envez di -3.7% cu a presupuesta . Como tal, a compronde cu lo recomenda medidanan extra, pero cu segun gobierno ya a laga sa, no ta bay ahusta. Di otro banda, otro medionan ta raporta cu for di parlamento mes, tin intento pa bin cu medida pa aumenta e.o. e BBO y BAZV cu 1%.