Reuniendo riba reapertura di refineria na Parlamento

ORANJESTAD - Awe mainta comision fiho di energia a cuminsa reuni cu ex ehecutivo halto di Coastal/El Paso, esta Nelson English  riba e.o. e posibilidad di reapertura di e refineria Valero. Tempran e delegacion presidi pa English a yega parlamento pa e reunion cu a cuminsa 8:30am. E reunion a wordo yama pa e comision fiho, y ta presidi pa e presidente di e comision ey, parlamentario Andin Bikker. Unabes cu e reunion aki termina, e reunion di presupuesto lo inicia pa 11'or di awe mainta. E delegacion presidi pa English, lo duna un presentacion tambe awe nochi 7'or na Surfside Marina, y mayan anochi 7'or na YMCA San Nicolas. Esun di San Nicolas, ta auspicia pa San Nicolas Business Association. 

REFINERIA

Ta conoci cu for di momento cu e refineria a sera su porta, tabatin intento pa su bendemento, pero te cu algun tempo pasa, esaki no a logra. Esey a conduci cu e refineria, siguiendo su plan, a cuminsa haci tramite pa desmantela e propiedad y asina lague cla pa entrega gobierno e tereno bek fin di e aña aki manera palabra.

REAPERTURA

No ta conoci con serio y concreto e plannan di English ta, ni si esaki ta algo cu enberdad por nifica e reapertura di e refineria. Den curso di dia lo tin mas informacion riba e asunto aki. E fotonan ta momento cu e delegacion mericano presidi pa English, a yega parlamento pa e reunion.