SNBA: Diadomingo tin evento pa firma pa sostene proyecto hotelero Secrets na San Nicolas

ORANJESTAD - San Nicolas Business Association (SNBA) diabierna a invita henter comunidad di Aruba na su evento di firma  “Say Yes to Secrets”.  Esaki lo tuma luga diadomingo dia 3 di September na parkinglot di Arubus, San Nicolas. 

Segun e gremio comercial di San Nicolas, durante añanan e comunidad di San Nicolas a enfrenta retonan comercial, falta di empleo y falta di trafico di turismo den e area.  E iniciativa aki segun e gremio, tin como meta pa apoya e proyecto di construccion di Secrets Hotel cu ta premira di trece cambionan positivo y  speransa di reviva San Nicolas atrobe. 

Segun SNBA, e Hotel su presencia lo stimula actividadnan di negoshi  y lo crea e oportunidad economico tanto pa San Nicolas como pa henter e pais. “E proyecto aki lo genera mas oportunidadnan di trabao pariba di brug. Esaki consecuentemente lo  reduci e dificultad di hopi residentenan di San Nicolas cu actualmente ta tuma bus y ta tuma nan 4 ora tur dia pa yega trabao y bolbe cas”. 

Ademas, SNBA ta sigui bisa, Secrets Hotel lo adopta un strategia amplio cu lo enfoca na  promove e participacion den actividadnan di responsabilidadnan social, ambiental y caritativo. Esaki ta encera yuda scolnan y otro instancianan social, y tambe colabora activamente cu initiativanan manera beach cleanups.

E ACTIVIDAD 

E actividad di coleccion di firma lo tuma luga diadomingo awor dia 3 di September di 12or di merdia te cu 6or di atardi den parkinglot di Arubus na San Nicolas. Esaki ta un oportunidad pa cada miembro di nos comunidad participa y forma parti di un cambio positivo y un futuro prospero pa San Nicolas. Durante di ultimo Business Summit di SNBA cu a tuma lugar diaranzon 30 di Augustus, e gremio a bisa cu por a tuma nota di e gran entusiasmo cu ta reina di parti di empresarionan pa cu e futuro desaroyo di San Nicolas.

San Nicolas Business Association ta spera cu comunidad di Aruba lo acudi den gran cantidad na e evento aki pa firma y apoya e projecto; Say Yes to Secrets, Say Yes to San Nicolas.