Van Huffelen: Tin consecuencia si Aruba entrega concepto laat di RAFt

DEN HAAG – Contrario na informacionan eroneo cu ta wordo publica na Aruba, debitamente tin un ultimatum cu gobierno di Hulanda a pone pa Aruba pa loke ta pa ricibi e oferta final pa e concepto di ley di Reino pa supervision financiero esta RAFt. E fecha aki ta dia 1 di September 2023. Si Aruba no entrega e proposicion pa e fecha ey, Aruba lo no haya e prestamo contra un interes special, pa por lo menos e prome aña di pago. Asina e secretario di estado Hulandes Alexandra van Huffelen a bisa e moderador Tito Laclé diahuebs anochi den e programa Noticiacla LIVEl. 

DEADLINE

Tabatin discusion si enberdad Aruba a haya un deadline pa cumpli cune, of si e tabata un ‘streefdatum’ osea un fecha obhetivo manera cu ta wordo bisa. “E ta enberdad un deadline” van Huffelen a sigura Laclé. Loke tambe ta posibel si, y aki e bruhacion a bin, ta cu na caminda si Aruba presenta un proposicion ainda despues, lo evalua esaki y na e momento ey, pa e siguiente aña of añanan, lo por cambia e tasa di interes y adapta esaki na uno mas bentahoso pa Aruba. Pero aworaki ta dificil pa bisa con esey lo bay pasobra no tin ni un proposicion ainda, te pa discuti y analisa si esaki ta un proposicion cu Hulanda por biba cu ne. Pues, Aruba debidamente lo tin consecuencia si e no presenta un proposicion na tempo. Ora cu a puntra e mandatario pa specifica cuanto tempo despues, e la bisa atrobe cu ta dificil pa bisa si ainda no tin un proposicion aden.