Portal internacional ta identifica Aruba eroneamente como ‘pais mas chikito’ den Sur America

MIAMI – Segun e portal turistico internacional Travel & Leisure Asia, Aruba ta aparece riba e lista di 14 paisnan mas chikito di mundo. Riba su mes un mencion interesante como cu un biaha mas Aruba ta wordo menciona internacionalente. Di otro banda, loke ta hala mas atencion ta e hecho cu pa reconoci cu e portal ta, e ta identifica Aruba eroneamente como ‘un pais parti di Sur America’. Algo cu sigur no ta e realidad y ta distorciona e realidad pa resto di mundo. “Como parti di Reino Hulandes, Aruba ta e pais mas chikito den Sur America na 180 meter cuadra cu un populacion di riba 100 mil habitante”, e  portal ta bisa. Fuera di e fayo grandi ey, e portal ta describi Aruba como un destinacion ‘soñador’, di cual su economia ta grandemente sosteni pa turismo, unda cu 2 miyon turista ta bishita e isla anualmente. Un punto positivo di e articulo ta cu e isla ta bon conecta cu buelonan frecuente di Merca, Canada, Sur America y parti di Europa.