Cruz Cora a celebra nan ‘Dia Internacional’

ORANJESTAD – Cruz Cora di Aruba a celebra nan “Dia Internacional” diabierna ultimo, cu un cantidad di actividad pareu. E actividad mas principal, tabata ponemento di prome piedra pa nan edificio nobo, cu mester keda cla na september proximo. Ademas a pin tur e voluntarionan pa nan aña di servicio. Entre nan, tin uno cu a resalta cu ta sr Ronald Roos cu tin mas di 30 aña como voluntario.

EDIFICIO NOBO

E necesidad pa e edificio nobo ta grandi segun e director di Cruz Cora Michel la Haye a splica NoticiaCla.com. Falta di espacio a pone cu aworaki e shelter ta tambe fungi como deposito pa varios material cu e organisacion aki tin.

VOLUNTARIONAN

Tabata un momento hopi importante pa e 200 y pico miembronan di Cruz Cora cu Aruba ta conta cune. Un Michel la Haye hopi contento a mustra cu e ta sumamente orguyoso di su ekipo, cu dia aden dia afo ta duna di nan mes pa por yuda otro.

PROME PIEDRA

Prome minister Mike Eman hunto cu la Haye a keda encarga cu e ponemento di prome piedra. Despues a pin e miembronan basa riba nan respectivo aña di servicio. Tabatin brindis tambe pa invitadonan y e directiva, cu a mustra cu nan ta masha satisfecho cu e loke cu nan ta mira pa cu Cruz Cora.