Parlamento ta trata ultimo dos cartera di presupuesto 2015

ORANJESTAD – Dialuna mainta pa 11'or parlamento ta trata e ultimo presupuesto di pais Aruba, esta e cartera di ministernan Mike Eman y Angel Bermudez. Por poco esaki a tranca, despues cu parlamento diabierna a mustra hopi cla, cu si no tin claridad riba interpretacion di protocol den presupuesto, no ta trata e ultimo dosnan menciona. Pa diabierna atardi laat, e splicacion a drenta di parti di gobierno di Aruba pa parlamento. Parlamento a confirma cu nan a ricibi esaki, y cu nan lo informa nan mes pa por trata e presupuesto final awe mainta. E intencion ta pa caba cu e tratamento awe mes, mirando cu tin un agenda ocupa e siman aki, cu ta pone cu varios parlamentario lo no ta disponibel pa continua cu tratamento di e presupuesto. 

TRATAMENTO DI PROTOCOL 

Durante e reunion di awe mainta, lo un biaha mas trata e protocol firma dia 2 di mei ultimo entre Hulanda y Aruba. Durante e momento ey, parlamento lo haci su preguntanan riba e caso aki, basa riba e contesta final di minister di finanzas Angel Bermudez diabierna ultimo. No ta descarta cu lo por bin sorpresanan durante e reunion aki, manera cambionan den forma di mocionan di tanto partido AVP como MEP y Democracia Real, pa ahusta e presupuesto toch. NoticiaCla.com a compronde cu un instancia gubernamental sigur, lo kier recomenda gobierno pa aplica cierto medida conseha pa CFT. 

MOCION Y AMIENDANAN

NoticiaCla.com a compronde cu ta intencion pa dialuna entrega un serie di mocion y amienda pa e presupuesto 2015, cu e meta pa e.o. aumenta e entrada di caha di gobierno. Diadomingo anochi tabatin informacion cu partido AVP lo tin intencion di entrega mocion pa aumenta un di e impuestonan existente, pa asina yuda aumenta e caha di gobierno asina. Tambe tin otro mocionan, cu tin cu trece aun mas cambio. Relaciona cu e consehonan di College Financieel Toezicht, tambe tin indicacion cu por spera mas mocion basa riba e tema aki. Tur ta relata na e protocol firma dia 2 di mei, unda cu ta mustra cu e consehonan di CFT mester wordo inclui. Esaki no obstante e carta di gobierno (lesa prome paragrafo) cu nan splicacion amplio.